Во СВР Охрид, на 13 декември 2024 година, 53-годишна жена од Охрид пријавила дека била измамена за сума од 300.000 денари.

Според изјавата на оштетената, пред две недели добила телефонски повик од лице кое ѝ соопштило дека поради наводно зголемување на вредноста на биткоинот, нејзината претходна уплата од 250 евра значително се зголемила и во нејзиниот електронски паричник сега имало 16.500 долари.

Лицето побарало од жената да преземе мобилна апликација и да има достапни пари на својата трансакциска сметка за да може да ги подигне средствата. Подведена од ветувањето за големата добивка, оштетената ја инсталирала апликацијата и подигнала кредит од финансиско друштво.

По некое време, откако посетила банка, дознала дека парите од нејзината сметка биле префрлени на сметка на друго лице, по што сфатила дека станала жртва на измама.

СВР Охрид презема мерки за целосно расчистување на случајот и идентификување на сторителот. Граѓаните се предупредуваат да бидат внимателни со непознати повици и трансакции преку интернет, особено кога станува збор за ветувања за брзи добивки.

Полициски службеници од ОВР Гостивар привеле двајца мажи од село Чегране, откако при претрес во угостителски објект биле пронајдени дрога и пари.

Како што информираат од МВР, на 13 декември околу 22:10 часот, по судска наредба бил извршен претрес во угостителски објект во село Чегране, сопственост на 49-годишниот Ш.Ш. и во присуство на 22-годишниот вработен З.И. При претресот, полициските службеници откриле и одзеле 53 пакувања со кокаин и марихуана, како и одредена сума пари.

„Двете лица се приведени и задржани во полициска станица. По целосно документирање на случајот, ќе биде поднесена соодветна кривична пријава“, соопштија од полицијата.

Малолетник од Скопје вчера беше приведен од страна на полициски службеници на Единицата за интервентна полиција при СВР Скопје во 21 часот на подрачјето на Бит Пазар.

При претрес, кај него бил пронајден и одземен нож, информираат од Министерството за внатрешни работи.

Од полицијата велат дека против малолетникот ќе биде поднесен поднесок по член 80 од Законот за оружје.

„Со овој случај уште еднаш апелираме до граѓаните, особено младите, да се воздржат од носење оружје. Оваа активност е дел од нашите засилени контроли со цел зголемување на безбедноста“, велат од СВР Скопје.