По повеќедневни активности и насоки од Основното јавно обвинителство за гонење организиран криминал, полицијата и Царинската управа спроведоа акција во која во бункери на возило е пронајден хероин во вкупна тежина од околу 5 килограми (4.951,7 грама).

Во врска со овој настан уапсени се две лица, од кои едниот е полицаец, а се трага и по уште едно лицe кое во моментов е во бегство.

Како што информираат од Oбвинителството, на 7 март годинава во претпладневните часови првоосомничениот, заедно со второосомничениот полицаец, заминале за Тетово со автомобил „голф 5“. Потоа од автосервис во Тетово зеле автомобил „бе-ем-ве“ во кој од левата и десната страна на крилата имало специјално направени бункери, по што се упатиле кон бензинска станица на автопатот Скопје-Петровец.

Таму го оставиле возилото со специјално направените бункери и заедно заминале кон Скопје со „голфот“.

Вечерта осомничениот полицаец, преку граничниот премин Долно Блаце, по упатства на првоосомничениот, заминал за Косово каде се сретнал со непознато лице од Приштина.
На средбата биле договорени деталите за неовластеното купување и пренесување на хероинот.

Утредента, во попладневните часови, по претходен договор, првоосомничениот со возило „ауди“ и третоосомничениот со автомобилот со направените бункери, преку граничниот премин Долно Блаце се упатиле кон Приштина.

За време на патувањето, осомничениот полициски службеник им давал насоки за точната локација од каде треба да се набави хероинот. Откако дрогата била сместена во бункерите на возилото, осомничените преку два различни гранични премини – Долно Блаце и Белановце се вратиле во земјава.

Сретнувајќи се кај селото Никуштак, продолжиле да се движат со возилата, еден зад друг, кон Скопје. На влезот од хотел „Белви“, возилото со хероинот било запрено од страна на полициски службеници и спроведено до Царински терминал каде мобилен тим на Царинската управа извршил контрола над возилото и пронашол 10 пакувања хероин во бункерите на возилото.

Полицискиот службеник и третоосомничениот – возач на „бе-ем-ве“, се уапсени и по предлог на јавен обвинител, судија на претходна постапка при Основниот кривичен суд – Скопје, им определил мерка притвор во траење од 30 дена.

Првоосомничениот при обид да биде запрен и легитимиран, со возилото „ауди“ се дал во бегство во правец кон село Арачиново. Возилото е пронајдено, а по осомничениот се трага.

Против трите лица е покрената истражна постапка поради сомневање дека сториле кривично дело неовластено производство и пуштање во промет на наркотични дроги.