Израел  започна нови напади насочени кон нуклеарната програма на Иран, а Иран возврати со ракетни напади во кои загинаа најмалку осум лица во Израел, третиот ден од невидена воена ескалација меѓу двете непријателски земји.

Иранскиот министер за надворешни работи се обрати до јавноста. Абас Арагчи рече дека одговорот на Иран на израелските напади бил чин на самоодбрана.

Тој додаде дека израелските напади, кои беа извршени први, не би биле можни без одобрение од САД. Вашингтон, рече тој, треба да ги осуди израелските напади врз нуклеарните постројки на Иран, додавајќи дека разговорите со САД можеле да доведат до договор.

Но, Израел, тврди тој, сакал да ги саботира тие преговори, кои САД ги сметале за клучни за ограничување на нуклеарната програма на Иран. Тој, исто така, изјави дека Иран не сака да ја прошири војната, освен ако не е принуден да го стори тоа.

Портпаролот на израелската војска издаде предупредување за евакуација до сите ирански граѓани во близина на воени објекти. Авичај Адрае објави „итно предупредување до сите ирански граѓани“ на социјалните мрежи.

„Сите лица што моментално или наскоро ќе се наоѓаат во или околу објектите за производство на воено оружје и сродните институции мора веднаш да ги напуштат тие области и да не се враќаат додека не се издаде понатамошно известување“, напиша тој.

Засега, борбите меѓу Израел и Иран се чини дека се ограничени на двете нации. Имаше широки повици за воздржаност во Обединетите нации и на други места. Но, што би се случило ако борбите ескалираат и се прошират во регионот и пошироко? Одговорите би можеле да имаат далекусежни последици, не само за Блискиот Исток, туку и за целиот свет. Би-Би-Си ја анализираше ситуацијата и даде неколку сценарија за тоа како би можел да се развие конфликтот.

Најдобри сценарија се дека конфликтот останува ограничен на Израел и Иран, дипломатскиот притисок го спречува ширењето на конфликтот, Иран не ги таргетира американските цели, израелските напади успешно уништуваат нуклеарни цели без поширок регионален одговор

Најлоши сценарија се дека Иран напаѓа американски бази и цели низ Блискиот Исток, САД се вклучуваат директно во војната, напади врз нафтената инфраструктура во Персискиот Залив, предизвикувајќи глобален енергетски шок, Израел не успева да ја уништи нуклеарната програма на Иран и Иран го забрзува развојот на оружјетоИранскиот режим паѓа, оставајќи вакуум сличен на оние во Ирак или Либија.

И покрај сите негирања од САД, Иран јасно верува дека американските сили ги овластиле и барем премолчено ги поддржале израелските напади. Иран би можел да нападне американски цели низ Блискиот Исток – како што се кампови на специјалните сили во Ирак, воени бази во Персискиот Залив и дипломатски мисии во регионот. Иранските посреднички сили – Хамас и Хезболах – можеби се значително намалени, но неговите милиции што ги поддржуваат во Ирак остануваат вооружени и недопрени.

САД стравуваа дека вакви напади се можни и повлекоа дел од персоналот. Во своите јавни пораки, САД силно го предупредија Иран за последиците од каков било напад врз американски цели. Што може да се случи ако американски државјанин биде убиен, да речеме, во Тел Авив или на друго место? Доналд Трамп може да биде принуден да дејствува. Израелскиот премиер Бенјамин Нетанјаху долго време е обвинуван дека сака да ги вклучи САД за да помогне во поразот на Иран.

Воените аналитичари велат дека само САД имаат бомбардери и бомби што уништуваат бункери што можат да продрат во најдлабоките нуклеарни постројки на Иран, особено во Фордоу. Трамп им вети на своите избирачи на MAGA дека нема да започне никакви таканаречени „вечни војни“ на Блискиот Исток.

Но, исто толку многу републиканци ја поддржуваат израелската влада и нејзиниот став дека сега е време за промена на режимот во Техеран.

Иран ноќеска започна нов бран ракетни напади врз Израел, во кои, според израелските медиуми, загинаа најмалку осум лица, а над 100 се повредени.

Нападите следеа откако израелската војска потврди дека извршила удари врз иранската нуклеарна инфраструктура, додека иранското Министерство за нафта соопшти дека е погодено складиште за нафта Шахран во Техеран.

Израелската служба за итни случаи Маген Давид Адом (МДА) потврди дека во нападите загинале четири лица во Бат Јам, јужно од Тел Авив: жена во 60-тите, жена во 80-тите, момче од околу 10 години и девојче, веројатно во истиот напад. Во Тамра, на северот на Израел, локални извори јавија дека четири жени од исто семејство загинале во еден од нападите.

МДА пријави 140 повредени, од кои некои се во тешка состојба, со напомена дека бројките може да се променат со пристигнувањето на нови податоци.

Цел на нападите биле делови од централниот дел на Израел, вклучувајќи го подрачјето околу Тел Авив, каде што во Бат Јам е директно погодена станбена зграда.