Маж од селото Старо Чајле се здобил со тешки телесни повреди откако изгубил контрола врз четирицикл и удрил во ограда и порта на приватен објект во село Чајле, гостиварско.

Според информациите од Министерството за внатрешни работи, сообраќајната несреќа се случила околу 11:20 часот на регионалниот пат во ова село. Возачот на четирициклот поларис, 31-годишниот Ф.Н. од Старо Чајле, при движење изгубил контрола и удрил во жичана ограда и метална порта од објект сопственост на Ш.Б.

Од здобиените повреди, Ф.Н. најпрвин бил хоспитализиран во Медицинскиот центар во Гостивар, по што, поради сериозноста на повредите, бил итно префрлен во Клиничкиот центар „Мајка Тереза“ во Скопје.

Увид на местото на несреќата извршила екипа од ОВР Гостивар, а за случајот бил известен и надлежен јавен обвинител.

Пешак на возраст од 50 години е тешко повреден во сообраќајна несреќа што утрово се случила во центарот на Скопје, на крстосницата меѓу улиците „Митрополит Теодосиј Гологанов“ и „Аминта Трети“ (поранешна „Ленинова“), со една од сервисните улици во близина.

Како што информира Министерството за внатрешни работи, околу 07:15 часот, патничко возило од марка фолксваген голф со скопски регистарски таблички, управувано од 37-годишниот А.Б. од Скопје, удрило во пешакот И.Н. (50), исто така од Скопје.

Пешакот со тешки телесни повреди бил пренесен во Градската општа болница „Св. Наум Охридски“, каде биле констатирани повредите.

На местото на настанот извршен бил увид од увидна екипа на СВР Скопје, а за случајот бил известен и дежурен јавен обвинител од Основното јавно обвинителство Скопје.

Причините за несреќата се предмет на понатамошна истрага.

Тринаесетгодишно дете го загуби животот, а 14-годишник е тешко повреден во тешка сообраќајна несреќа што се случила вчера утрината во прилепското село Лажани. Несреќата се случила околу 08:50 часот, при судир на два мопеда без регистарски таблички, марка бенели и пежо, управувани од малолетници, двајцата жители на истото село.

Како што соопшти Министерството за внатрешни работи, судирот се случил на локален пат, при што 13-годишниот возач починал од здобиените повреди. Смртта била констатирана во Градската болница во Прилеп. Вториот учесник во несреќата, 14-годишно момче, е хоспитализиран со тешки телесни повреди, но се наоѓа надвор од животна опасност.

На местото на настанот извршен бил увид од јавен обвинител и увидна екипа од ОВР Прилеп. Телото на починатото дете е предадено на обдукција.