Полицијата вчера го приведе И. Б. (57) од селото Копаница, Скопско. Имено, по претходно добиена судска наредба за претрес од страна на судија на претходна постапка од Основниот кривичен суд Скопје, полициските службеници извршиле претрес во домот на И. Б., при што пронашле еден пиштол „стаер“, со две соодветни рамки и 61 куршуми во калибар од 9 мм. Од спроведената истрага утврдено е дека пиштолот потекнува од кражба извршена на 20.1.2023 во домот на М. Б. во Струмица од страна на нејзиниот роднина П. И. (25) од Струмица, кој на 23.1.2023 е лишен од слобода затоа што ја убил и веќе издржува мерка притвор од 30 дена.

Воедно, во координација со Управата за извршување на санкциите, вчера, во вечерните часови, извршен е претрес и во КПУ „Идризово“, каде што се пронајдени дополнителни докази во врска со извршеното кривично дело недозволено изработување, држење и тргување со оружје или распрскувачки материи. Од страна на СВР Скопје, по комплетно документирање на случајот, ќе биде поднесена соодветна кривична пријава по член 396 од Кривичниот законик до надлежното ОЈО Скопје, соопшти МВР.