Црна хроника
Приведен агентот за надвижности кој продавал еден стан на повеќе лица

Агентот за недвижности, кој измами повеќе лица продавајќи им ист стан, денеска е приведен.
Основното јавно обвинителство Скопје поведе постапка против него за измама. Против него ќе биде поднесен предлог за определување мерки на претпазливост – обврска повремено да се јавува кај определено службено лице во судот, привремено одземање на патната исправа и забрана за издавање нова, како и забрана за преземање определени работни активности.
„Во периодот од мај 2020 година до март 2021 година осомничениот во повеќе наврати, искористувајќи ист траен однос и исти услови, довел и држел во заблуда најмалку седум оштетени граѓани. Со намера за себе да прибави противправна имотна корист тој како агент во својата агенција за недвижности лажно им прикажувал факти на оштетените дека е овластен од разни сопственици да ги продава нивните станови на други лица. Откога ќе ги огласел становите, ги покажувал пред потенцијалните купувачи, договарал продажба и наплаќал средства на име капар, но потоа не доаѓало до склучување купопродажен договор, а уплатените средства не ги враќал“.
Постапката против осомничениот е во тек, се испитуваат лица и се обезбедуваат и други докази.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Тешко повреден прилепчанец, повредена и неговата сопатничка: удриле во куче со мопедот и паднале на патот

Во Полициската станица Прилеп, вчера околу 18:10 часот било пријавено дека на ул.„Мице Козар“ во Прилеп, мопед со прилепски регистарски ознаки, управуван од Џ.А.(51) од Прилеп удрил во куче и паднал на коловозот.
Во несреќата со тешки телесни повреди се здобил возачот, а со телесни повреди се здобила неговата 15-годишна сопатничка, констатирани во Градската болница Прилеп. Извршен бил увид од увидна екипа од ОВР Прилеп.
Црна хроника
Прегазен маж во Струмичко

Вчера во 13:15 часот во СВР Струмица е пријавено дека на магистралниот пат Струмица-Граничен премин Ново Село кај с.Ново Село, патничко возило „фолксваген пасат“ со струмички регистарски ознаки, управувано од Т.А.(33) од с.Зубово удрило во пешакот Ж.Ј.(47) од с.Габрово.
Во несреќата со тешки телесни повреди се здобил пешакот, констатирани во Медицинскиот центар Струмица. Извршен бил увид од увидна екипа од СВР Струмица.
Црна хроника
Полицаец купил возило што се расипало, па упатувал закани кон сопственикот на сервисот за продажба

Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство Велес поднесе кривична пријава против С.А., на работно место полицаец во Полициска станица од општа надлежност Велес.
Тој се сомничи дека сторил кривично дело „загрозување на сигурноста“ по член 144 став 2 во врска со ст.1 од Кривичниот законик.
С.А. на 31.08.2025 со намера да вознемири или заплаши сопственик на сервис за продажба и поправка на возила од кого купил половно возило, за кое добил гаранција дека е во исправна состојба, но кратко време по продажбата при управување настанал дефект, му упатил закани на него и на членови од неговото семејство. Од страна на ПС ОН Велес на полицискиот службеник С.А. одземено му е службеното оружје со кое бил задолжен, а Одделот за внатрешна контрола криминалистички истраги и професионални стандарди ќе поднесе предлог за поведување на постапка за кршење на работниот ред и дисциплина и ќе изрече задолжителни мерки отстранување од работното место до завршување на дисциплинската постапка.