Надлежен јавен обвинител од Основното јавно обвинителство за гонење организиран криминал и корупција, денеска донесе наредба за спроведување истражна постапка против косовски државјанин поради сомнение дека сторило кривично дело шверцување мигранти.

„Во текот на вчерашниот ден осомничениот пеш ја поминал македонско-косовската граница и по добиените насоки од непознато лице, го презел патничкото моторно возило ‘форд транзит’ и тргнал по автопатот А1 во правец кон Гевгелија. На непознато место пресретнал група мигранти, кои претходниот ден илегално влегле во земјата, ги прифатил и тргнал во насока кон Скопје. На знакот да застане од страна на полициски мешовит тим, осомничениот продолжил со зголемена брзина и кај клучката кон с. Смоквица го напуштил возилото со мигрантите и побегнал. Полициските службеници во возилото пронашле 58 мигранти од Пакистан и Сирија, меѓу кои имало и седум малолетни лица. Подоцна осомничениот е пронајден во близина на с. Миравци и уапсен“, соопшти Јавното обвинителство.

Ценејќи дека се исполнети условите, надлежен јавен обвинител до судија на претходна постапка достави предлог за определување на мерката притвор за осомничениот. Судијата го прифати предлогот и на осомничениот со решение му определи мерка притвор во траење од 30 дена.