Вицепремиерот и министер за транспорт Александар Николоски истакана дека од досегашните контроли на над 3100 лиценци во делот на градежното работење и урбанистичкото планирање, кај 479 лиценци констатирано е неправилно работење и поради тоа на сите овие правни лица ќе им бидат одземени лиценците.

“ Оваа листа ќе биде доставена до соодветните институции за понатамошно постапување. Исто така би сакал да најавам дека ќе пристапиме кон законски измени со кои овие контроли ќе бидат обврзни на секои шест месеци, а не како досега на доброволна основа и за следните контроли жалбата нема да го одлага извршувањето односно суспензијата ќе оди веднаш. Целта не е да казнуваме туку компаниите кои добвоволно се согласиле на условите што ги предвидува законот, доборволно да ги исполнуваат затоа што феноменот е дека во моментот на поднесување на барањето ги усполнуваат,  а потоа престануваат да исполнуваaт тие услови. За да не настане забуна, контролите се прават на лиценците во делот на потребниот број на вработени, а во дел на квалитет на изведување и во дел на квалитет на навремено извршување постојат соодветни надзори кои ги контролираат градбите”- истакна вицепремиерот Николоски.

Во текот на вчерашниот ден и денеска истражните тимови на Јавното обвинителство и на Министерството за внатрешни работи координирано преземаат дејства за обезбедување докази во истрагата во врска со трагичниот пожар во Кочани.

Извршени се претреси на пет локации во Кочани и во Скопје, при што се одземени дополнителни електронски уреди и други докази за кои се издадени наредби за вештачење. Извршени се и распити на лица што би можеле да имаат определени сознанија.

Во текот на денот Јавното обвинителство ќе издаде наредба и до Управата за финансиска полиција за преземање определени дејства поврзани со материјалното работење на повеќе правни субјекти, на осомничените и на други лица.

Од 115 пациенти повредени во пожарот, кои се лекуваат во странство, денес во земјата се враќа еден пациент, кој се лекуваше во Белград. Министерот за здравство, Арбен Тараври, вели дека тој ќе го продолжи лекувањето кај нас.

„Пациентот е во добра општа состојба. Како што кажавме вчера, тој 24 часа минимум треба да престојува на една од клиниките. Ќе биде направена тријажа и потоа ќе биде сместен на една од клиниките во Клиничкиот центар“, рече министерот Таравари.

Од пациентите што се лекуваат надвор од земјата се уште четворица – петмина, како што нагласи министерот Таравари, сѐ уште се во посериозна состојба, кај некои имало и влошување на состојбата, но тој уверува дека здравствените работници даваат максимум за да им помогнат да го поминат овој тежок период.

Рехабилитацијата за пациентите што се во потешка состојба, која се очекува да биде подолготрајна, ќе биде во странски болници.

„Веќе имаме понуди од неколку западноевропски држави за подолгорочна рехабилитација на потешките пациенти, кои по неколку недели, ќе се вратат во Македонија. За оние што се потешки и кај кои треба подолгорочна и попрофесионална рехабилитација веќе изразуваат подготвеност. Во следните денови ќе известиме и каде може да бидат сместени тие пациенти доколку има потреба за подолготрајна рехабилитација. Од оние што се во потешка состојба сигурно некои ќе имаат и таква потреба“, вели министерот Таравари.

Во болниците во Скопје во моментот се лекуваат 39 пациенти. 12 од нив се на Клиничкиот центар, 10 пациенти се во старата Градска болница, 10 во ГОБ „8 Септември“. Во приватните клиники се седуммина пациенти.

Министерот Таравари рече дека добрата вест за денес е тоа што од болница излегуваат 12 пациенти, па на лекување во скопските болници ќе останат 27 повредени во пожарот во Кочани.