Црна хроника
Проширена истрагата за едно лице поради учество во ИСИС
Во рамките на истражната постапка во врска со предметот во кој седум лица се осомничени дека како странски терористички борци активно учествувале во војните во Сирија и Ирак, надлежен јавен обвинител од Основното јавно обвинителство за гонење организиран криминал и корупција за едно од лицата ја прошири истрагата.
„Надлежниот обвинител во изминатиот период ги сослуша осомничените и притоа оцени дека постои основано сомнение дека осомничениот сторил кривично дело учество во странска војска, паравоени или параполициски формации, предвидено и казниво по член 322-а, ст. 3 од Кривичниот законик, поради што ја прошири истрагата и донесе наредба за спроведување истражна постапка и за ова кривично дело. Со цел да стане учесник во паравоените формации на ИСИС, осомничениот, во точно неутврден период од 2014 до 2016 година, ја напуштил територијата на Република Македонија и заминал во Сирија. Таму осомничениот се обучувал и учествувал во паравоените формации на ИСИС, при што како борец бил заробен од страна на Сириските демократски сили и затворен во Дирек, воениот затвор во Ал-Маликијах во провинцијата Ал-Хасака во Сирија“, се наведува во соопштението на ОЈО.
За пет лица од седумтемина што во моментот се во притвор, а кои во соработка со партнерите од Глобалната коалиција за борба против тероризмот и Сириските демократски дили во август оваа година беа приведени, се водат истражни постапки во рамките на претходните акции познати во јавноста како „Ќелија 1“ (август 2015) и „Ќелија 2“ (јули 2016). Четири лица од притворените се дел од истражната постапка во предметот „Ќелија 1“, а осомничениот, за кој се проширува истрагата, е од постапката во предметот „Ќелија 2“.
При спроведувањето на тогашните акции овие лица им беа недостапни на органите на прогонот и за нив беа активни национални и меѓународни потерници.
Кога во септември 2014 година беше донесен Законот за изменување на Кривичниот законик и беа создадени законски услови, предметот познат во јавноста како „Ќелија 1“ беше прв поведен случај во Република Македонија против лица што заминуваат во странски војски и се борат на воените жаришта на Блискиот Исток. Во овој предмет Обвинителството првпат гонеше 36 лица за сторено кривично дело учество во странска војска, паравоени или параполициски формации. Во спроведената акција, 11 лица беа притворени, а другите 25 беа недостапни за органите на прогонот.
Во текот на 2016 година беше поднесен обвинителен акт за 11 лица по што на јавната седница за оцена на обвинителниот акт, шестмина обвинети изразија подготвеност за признание на вина и побараа спогодба со Обвинителството. Основниот суд Скопје 1 – Скопје ги прифати спогодбите со Обвинителството и шестемина осомничени ги прогласи за виновни изрекувајќи казни затвор определени во постигнатите спогодби во траење од 5 години до 5 години и 6 месеци.
Другите петмина, кои не признаа вина на главната расправа пред судот, истакнаа дека се чувствуваат виновни и ги признаа делата што им се ставаат на товар. На 18 мај 2016 година за обвинетите беа изречени казни затвор во траење од 2 години до 4 години и 6 месеци. Незадоволно од казните, Обвинителството до Апелациониот суд – Скопје вложи жалби, кои на 6 февруари 2017 година беа уважени и обвинетите се осудени на казни затвор во траење од 3 години до 6 години и 6 месеци. Во меѓувреме, врз основа на распишаните национални и меѓународни потерници, двајца осомичени беа екстрадирани од Косово, еден од Република Албанија и еден осомничен беше лишен од слобода во Република Македонија. Со овие лица Обвинителството склучи спогодби и лицата беа осудени на казни затвор од 1 до 3 години.
Седуммината опфатени во акцијата „Ќелија 2“, меѓу кои е и осомничениот за кој се проширува истрагата, се товарат за сторено кривично дело терористичка организација. Во акцијата спроведена на седум локации во Скопје и Тетово, на 9 јули 2016 година, во раните утрински часови, беа уапсени четири лица – поранешни припадници на ИСИС, а подоцна беше уапсено уште едно лице. За другите три лица се распишаа национални и меѓународни потерници.
Обвинетите во овој предмет се припадници на терористичка организација Исламска држава. Тројца од нив во повеќе наврати учествувале во терористичките напади во околината на Дамаск, како и на воената база во близина на Алепо, а другите биле дел од терористичките напади на градот Деризор, воената база Рака, официјалниот граничен премин помеѓу Сирија и Ирак, како и нападот на воздухопловната база во Ирак, а исто така објавувале и снимки од погубување речиси 50 затвореници. Во октомври 2016 година петтемина обвинети ја признаа вината што им се става на товар и склучија спогодби со Обвинителството, со кои се осудени на казна затвор од 2 години и 4 месеци до 2 години и 8 месеци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.