По спроведена истражна постапка, Основното јавно обвинителство Скопје до Основниот кривичен суд Скопје поднесе обвинителен акт против едно лице што се товари за неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

На 2 март, на автобуската станица во населбата Хиподром, обвинетиот 26-годишник во рацете носел две најлонски кеси со марихуана и една дигитална вага, која веднаш му била одеземена од полициски службеници. Подоцна, во неговиот автомобил, паркиран во дворот, биле пронајдени три најлонски кеси и една сина кутија со марихуана, како и еден шприц со хашиш-масло. При претрес на домот на обвинетиот во селото Булачани, пак, било утврдено дека тој неовластено произведувал марихуана за што набавил опрема и инсталирал лабораторија за одгледување. Притоа биле пронајдени и 69 саксии со засадено растение канабис, како и метална кутија со шест полиетиленски паковувања марихуана.

Со оглед на тоа што и натаму постојат околности што укажуваат на опасност од бегство и можност обвинетиот да го повтори делото, надлежниот јавен обвинител до судот достави и посебен предлог со кој побара да се продолжи претходно определениот притвор за обвинетото лице.​