Кривичниот суд излезе во јавноста со соопштение во врска со претходните судски постапки што биле водени против 20-годишниот Васил Јованов, кој ја усмрти младата Фросина Кулакова на улицата „Партизански одреди“.

Од судот за затекнувањето со дрога лани велат дека Јованов бил првостепено осуден со пресуда по која постапувала судијата Даниела Алексовска-Стојановска.

„Поради неговата возраст, со неполни 20 години, а во согласност со одредбите од Законот за правата на децата, судот му изрекол воспитна мерка: заводска мерка – упатување во воспитно-поправен дом, каде штпо во согласност со чл. 48 ст. 3 и ст. 4 обвинетиот во домот останува најмалку 6 месеци, а најмногу 5 години, односно до наполнети 23 години, во која пресуда му се пресметува и времето поминато во притвор, по истиот предмет од 2.4.2024 година до 12.8.2027 година“, објаснуваат од Кривичен.

Од тука велат дека во согласност со одредбите во законот мерката притвор не може да опстојува поради што јавниот обвинител вложил жалба во однос само на кривичната санкција.

„Предметот на 7 ноември минатата година е доставен на надлежно постапување на Апелациониот суд Скопје, од каде што сѐ уште не е вратен на евентуално извршување“, велат од Кривичен.

Понатаму, како што се додава, во согласност со евиденцијата на судот Јованов не бил осудуван за друго кривично дело и не се водела друга постапка за други кривични дела. Исто така, до овој момент до судот не е процесирана друга кривична пријава ниту, пак, прекршочна пријава од областа на сообраќајот, а лицето е евидентирано, единствено како малолетник во 2021 година кога му е изречена судска опомена поради нарушување јавен ред и мир.

„Како суд изразуваме жалење за загубата на млад човечки живот. Но, имајќи го предвид сето погоре наведено, нејасна е конекцијата што се создава во јавноста за кривичен предмет кој во прв степен е завршен со заводска мерка на одредено лице за едно кривично дело со друго кривично дело сторено 7 месеци потоа. Дали некој во правосудниот систем можел да претпостави дека обвинетиот по 7 месеци од донесената пресуда, со која тој треба да се институцијализира, може да стори друго кривично дело, па поради тоа требало да биде задржан во притвор. Законите во нашата земја, како и меѓународните конвенции за човекови права, тоа не го дозволуваат. Дали за системскиот проблем со црните сообраќајни точки, каде што често се случуваат сообраќајни несреќи, вината е на судството, ако се има предвид кој било граѓанин што претходно не бил во судир со законите, може да предизвика сообраќајна несреќа со жртва поради недозволена брзина, управување под дејство на алкохол и непоседување возачка дозвола. Станува збор за општествен проблем“, се вели во соопштението на судот.

Во врска со смртта на Кулакова, возачот Јованов е во притвор во траење од 30 дена поради опасност од бегство, попречување на истрагата со влијание врз сведоците и опасност да го повтори делото.

Граѓаните излегоа на протест на улицата Партизански одреди, каде што 20-годишниот Васил Јованов завчера ја усмрти 22-годишната Фросина Кулакова.

Се оставаат цвеќиња и се палат свеќи крај фотографијата на Фросина, а демонстрантите носат транспаренти, на кои пишува: „Врските не враќаат човечки животи“, „Сите одиме кај ист судија, а таму има само една правда“, „Уште колку?“, „Не е несреќа, туку убиство“.

Граѓаните бараат построги казни и промени.

Според информациите од Обвинителството, Јованов возилото го управувал пијан, без возачка дозвола и поминал на црвено светло.

Граѓаните дополнително се возмемирени и револтирани по информацијата дека возачот им бил познат на органите бидејќи лани бил фатен со дрога и завршил во притвор, а потоа со одлука на судот во попрвен дом. Тој предизвикал уште една сообраќајка без возачка на 4 ноември 2022 година, во која едно лице добило полесни повреди. Со изјавена согласност на оштетената јавен обвинител донел решение со кое не се презема кривично гонење, а тој платил глоба од 18.000 денари.

Mинистерот за внатрешни работи Панче Тошковски најави построги контроли и казни, но, вели, најважно е правосудните органи соодветно да ги санкционират виновниците. Министерот за правда, Филков, пак, претходно рече дека потребна е промена на целиот систем.

Министерката за финансии Гордана Димитриеска-Кочоска апелира не само маркетите туку сите компании да го почитуваат Законот за нефер трговски практики и да не ја злоупотребуваат недоволната екипираност на некои институции, кои не може да направат контрола во одреден момент. Кога ќе им биде направена контролата, доколку се утврди непочитување на законите, Димитриеска-Кочоска вели дека ќе следуваат драконски казни.

„Можеби во овој период одредени државни институции, поради лимити во капацитетите и така натаму, не можеле да излезат и да ги ионтролираат состојбите, меѓутоа знаете дека кога станува збор за пари и финансиски трансакции, сѐ останува за навек. Ние може да отидеме и по 12 месеци од денес и да направиме контроли и доколку утврдиме, ќе бидат казнети. Затоа, апелирам до сите, не само до трговските синџири, до сите компании во државата, да се почитуваат законите. Ништо повеќе од тоа затоа што во некој момент која било од институциите ќе излезе на терен, ќе направи контрола, ќе се врати назад, ќе следуваат драконски казни“, рече министерката Димитриеска-Кочоска.

Таа потсети дека и од опозиција предупредувале оти инфлацијата кај нас повеќе е создадена однатре отколку што е увезена и нагласи дека тој став не го сменила.

„Во континуитет повторувавме со години дека инфлацијата во Македонија повеќе е создадена однатре отколку што е увезена. Јас не сум друга личност, јас сум истата Гордана од пред една година. Истото тоа го зборував и тогаш, истото тоа го зборувам и денес. И што кажувам? Да се почитува Законот за нефер трговски практики. Ништо повеќе од тоа. Истото тоа ви го кажав и пред неколку месеци, таму некаде во септември, кога се спроведуваа одредени мерки од страна на Владата, истото тоа го кажувам и сега“, вели министерката Димитриеска-Кочоска.

Инспекциите се во контрола и денес, а за резултатите од најавениот бојкот на маркетите, Управата за јавни приходи најави дополнителни информации.