Црна хроника
Скопјани лажеле дека се управители и набавувале разна стока, оштетиле повеќе фирми
Двајца скопјани лажно се претставувале дека се комерцијалисти и управители во фирми и набавувале разна стока. Тие оштетиле неколку фирми, а нарачувале кoмпресори, пумпи, конвертори, акумулатори и генератори.
Основното јавно обвинителство Скопје до судот поднесе обвиненителен предлог против две лица, од кои едното се товари за продолжено кривично дело измама, а другото лице е обвинето за помагање при извршувањето на истото кривично дело.
Според информациите од Обвинителството, првообвинетиот со намера да прибави противправна имотна корист, телефонски контактирал управител на правно лице од Неготино и лажно му се претставил како комерцијалист во фирмата АЛФИ-И-2019 ДООЕЛ Скопје и навел дека на правното лице му е потребна стока за нов маркет, кој набргу треба да биде отворен. Притоа нарачал стока – кoмпресори и пумпи во вкупна вредност од 239 илјади денари. Второобвинетиот ја примил стоката во магацин на Качанички Пат и се потпишал на испратницата. Но, лицата што ја испорачале стоката инсистирале на испратницата-фактура да биде ставен и печат на фирмата, па кога забележале дека печатот и името на фирмата на која гласи фактурата не се совпаѓаат, побарале да си ја земат стоката назад, што не им било дозволено.
Неколку дена подоцна, првообвинетиот се јавил кај фирма во Скопје и на истиот начин нарачал четири парчиња вибро-игли за бетон и два конвертора со вкупна вредност од 194.606 денари, кои наводно му биле потребни за нов магацин што треба да се отвори во населбата Илинден. Оштетениот побарал претходна гаранција, но обвинетите го уверувале дека станува збор за сериозна фирма и дека исплатата на стоката ќе биде направена за 3-5 дена по што го поканиле во седиштето на фирмата за да се увери за каква фирма станува збор. Оштетениот го испратил својот татко, а двајцата обвинети лично го уверувале во сериозноста на фирмата по што стоката била испорачана. Второобвинетиот се потпишал на фактурата и уште еднаш лажно ги потврдил податоците на правното лице што се јавило како купувач.
Кон крајот на декември минатата година првообвинетиот телефонски стапил во контакт со шеф на магацин во третото оштетено правно лице и се претставил како управител на фирма која е заинтересирана за купување акумулатори. Кога биле договорени деталите, лично отишол во магацинот на оштетеното правно лице, ги уверил управителот и шефот на магацинот во сериозноста на неговата фирма и во два дена подигнал акумулатори во вкупна вредност од 285.364 денари.
На крајот на март годинава првообвинетиот телефонски стапил во контакт со управител на правно лице од Кадино и навел дека е заинтересиран за купување генератор, при што била договорена цена од 10.500 евра во денарска противвредност. Истиот ден обвинетиот пристигнал во магацинот на оштетеното правно лице за да ги договори деталите за исплата преку наводна кредитна рамка од една банка. Кога биле договорени деталите, оштетената фирма испорачала агрегат во вредност од 645.750 денари. Следните два дена обвинетиот лично одел во оштетената фирма и подигал и друга стока вредна 205.669 денари.
Надлежниот јавен обвинител побара од судот за првообвинетиот да биде продолжена претходно определената мерка притвор, а за второобвинетиот мерката куќен притвор, со цел непречено водење на кривичната постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Судир меѓу две возила на „Цветан Димов“, скопјанец е тешко повреден
Скопјанец е тешко повреден во судрир меѓу две возила во Скопје.
– На 30.04.2024 во 12.35 часот во СВР Скопје било пријавено дека на ул.„Цветан Димов“ во Скопје се случила сообраќајна несреќа помеѓу патничко возило „форд“, управувано од Ј.Р.(51) од Скопје и патничко возило „фолксваген“, управувано од Б.Р.(67) од Скопје, двете со скопски регистарски ознаки. Во несреќата со тешки телесни повреди се здобил Б.Р., констатирани во Градската општа болница „Св.Наум Охридски“, информираа од полицијата.
Црна хроника
Удрена пензионерка во Скопје, со тешки повреди е пренесена во болница
Вчера во 14.20 часот во СВР Скопје било пријавено дека на ул.„Јустинијан Први“ во Скопје товарно возило „форд“ со скопски регистарски ознаки, управувано од А.М.(32) од Скопје удрило во пешакот Љ.В.(73) од Скопје.
Во несреќата Љ.В. се здобила со тешки телесни повреди, констатирани во Градската општа болница „Св.Наум Охридски“. Извршен бил увид од увидна екипа од СВР Скопје.
Црна хроника
Претрес во Стојаково, пронајдена дрога, приведено едно лице
Вчера во 16.10 часот во село Стојаково, општина Богданци, полициски службеници од ОВР Гевгелија го лишиле од слобода В.К.(30) од село Стојаково.
При претрес на неговиот дом, извршен со судска наредба, била пронајдена марихуана. За настанот бил запознаен јавен обвинител од Основното јавно обвинителство Гевгелија и по документирање на случајот против него ќе биде поднесена соодветна пријава.