Парното поскапува за 5,03 проценти, информира на денешната прес-конференција претседателот на Регулаторната комисија за енергетика (РКЕ) Марко Бислимоски.

Според него, причина за поскапувањето е зголемувањето на цената на природниот гас на светските берзи и намаленото производство на ТЕ-ТО кое наместо 60 отсто учествувало со 51,9 отсто во производството на топлинска енергија.

„Врз основа на трите барања од страна на трите компании на ЕСМ кои се занимаваат со производство, дистрибуција и снабдување со топлинска енергија одржана е седница и донесена е одлука со која цената за потрошувачите на топлинска енергија во Скопје ќе се зголеми за 5,03 проценти.

Основна причина е поради тоа што предвидената цена за природен гас за месец јули од 37 евра за мегават час а сега признаваме дека имало зголемен трошок и признаваме зголемена цена за 16 проценти а тоа е 43 евра за мегават час. Втора причина која влијаеше за одлуката е тоа што во јули сме предвиделе дека учеството на Те-То во обезбедувањето на вкупните потреби за топлинска енергија ќе иснесува 60 проценти а од топланите во Скопје ќе обезбедиме 40 проценти“, изјави Бислимоски.

Зголемувањето на сметките ќе биде 100 денари за просечно семејство.

Цената ќе се применува од први февруари.

Се очекува наскоро и топлификација Скопје Север да поднесе барање за зголемување на цената на парното во тој дел од градот, најави Бислимоски.

Министерот за правда Игор Филков упати сочувство до семејството и пријателите на прерано загинатата Фросина Кулакова, која беше смртно прегазена завчера на булеварот „Партизански одреди“.

„Некогаш нема утешни зборови, но она што можам да се заложам е дека мојата политичка позиција и мојата човечка мисија ќе ја насочам за менување на работите од корен. Целиот систем мора да се менува однадвор и одвнатре“, вели министерот.

Од Обвинителството претходно соопштија дека дваесетгодишникот кој го управувал возилото на неговиот татко, немал возачка дозвола, бил под дејство на алкохол и поминал на црвено светло додека девојчето поминувало улица на обележан пешачки премин.

Во врска со минатото на младиот возач без дозвола, ова не била негова прва сообраќајна незгода. Тој предизвикал сообраќајка и на 4 ноември 2022 година, во која едно лице добило полесни повреди. Со изјавена согласност на оштетената, јавен обвинител донел решение со кое не се презема кривично гонење, а тој уплатил паричен износ од 18.000 денари.

Обвинителството се произнесе и за неговото минато со дрога. Имено, МВР против возачот поднело кривична пријава на 30 март минатата година поради неовластено производство и пуштање во промет наркотични дроги. Осомничениот на 2 април почнал да ја издржува мерката притвор за ова дело, но истрагата била завршена за помалку од 2 месеца. Обвинителството во мај барало продолжување на притворот, и бил продолжен до 31 јули, кога Основниот кривичен суд Скопје донел пресуда со која го огласил за виновен и му изрекол воспитна мерка – упатување во воспитно-поправен дом, информираа од Обвинителството.

Јавниот обвинител незадоволен од пресудата вложил жалба и предметот сѐ уште е во жалбена постапка.

За денес во 13 часот најавен е протест на местото на кое почина девојката, кај Универзалната сала.

Студентскиот отпор изразува длабоко сочувство до семејството на Фросина Кулакова.

„Оваа загуба е резултат на системски недостатоци, кои ја загрозуваат безбедноста на сите нас.

Долгогодишната неказнивост, институционалната негрижа и структурното насилство не само што ни ги одземаат можностите во образованието туку резултираат и со трагедии што не може да се преболат. Оваа неправда нема да остане без одговор!“, соопштуваат од Студентскиот отпор.

Од таму ги повикуваат сите студенти денеска во 13 часот пред „Силбо“.

„Затоа што вака се чувствуваме небезбедни. За нашата колешка Фросина. За сите нас“, додаваат од Студентскиот отпор.