Христијан Мицкоски, претседател на ВМРО-ДПМНЕ и премиер на вечерашната трибина на тема „Реформи во здравството, ги градиме темелите на промените“ во организација на ВМРО-ДПМНЕ, а која се одржа во Штип се осврна на актуелни теми меѓу кои ситуацијата со пожарите и гласањето недоверба во Собранието за јавниот обвинител Љупчо Коцевски.

„Гледам една нескриена радост и возбуда кај опозицијата од пожарите. Истата таа возбуда ја имаа и кога секојдневно ја злоупотребуваа големата и ужасна трагедија во Кочани. Така брутално, дневно политички и паушално излегуваат на прес-конференции додека стотици граѓани заедно со пожарникарите и полицијата и луѓето од „Македонски шуми“ борба бијат на дневно ниво против пожарите во Македонија и во време кога за жал нашата татковина во одредени делови е во пламен“, рече Мицкоски.

Мицкоски укажа дека „тие наместо да бидат помеѓу народот одбираат со салонски прес-конференции да потпалуваат и да се радуваат на секој пожар“.

За разлика од претходната владата, сега, кажа тој, актуелната за една година ги стави во употреба авионите, леталата, цела флота на БТР возила, хермелини и пинцгауери за гасење на пожари.

„Кога нивни луѓе ќе ги видиме озарени како потпалуваат пожари за да има политички пожари, како живи ќе ги фатиме со огнот во раце за да имаат потоа причина за прес-конференции, тука се е јасно“, кажа Мицкоски.

Коментираше и за гласањето недоверба за јавниот обвинител Коцевски.

„Уште една тема којашто вчера многу јасно, кристално јасно ја видовме во македонското Собрание како постапуваат против интерпелацијата на државниот јавен обвинител. Сами се соголија. СДСМ и ДУИ останаа единствената сламка за спас на кариерата на државниот јавен обвинител затоа што е јасно дека тој им е последниот бастион во одбрана на нивниот криминал во изминатите 7 години, затоа нема ниту еден отворен случај против висок функционер на СДСМ и ДУИ“, посочи Мицкоски.

Според него, „паѓаат во вода сите оние тиради од прес-конференции за оној страшен ужасен случај во Кочани, оние лажни повици, буцкањата каде лажно велеа дека бараме правда“.

„Па тој случај токму го води, токму овој за којшто сега зборував, нивниот државен јавен обвинител и нема потреба да повикуваат јавно, слободно нека си го викнат, нека си се затворат во канцеларија тие малкумина што останаа во раководството на СДСМ и ДУИ и нека си го прашаат Коцевски до каде е. А ние нема да се откажеме од борбата за правда и подобар живот и правда ќе има, и ќе има подобра иднина која сакаме да ја донесеме“, дополни Мицкоски.

Денес попладне повторно се разгоре пожарот над селото Подареш на планината Готен од радовишка страна, информира директорот на ДЗС, Стојанче Ангелов. Како што рече со овој пожар надлежните борба водат над 15 дена и е исклучително тежок пожар за гаснење. Ангелов уверува дека пожарот нема да го загрози селото. Прашање е како што рече, колкава штета ќе нанесе на природата околу селото.

Според него ангажирани се сите ресурси, меѓу нив и полицискиот хеликоптер и чешкиот „Блек Хок“ како и противпожарни служби на општината и месното население.

Инаку на територијата на државата до 18 часот попладнево има вкупно 24 пожари на отворен простор, од кои шест се активни, два се под контрола а 16 се изгаснати, соопшти ЦУК.

Активни се шест пожари:
1. Општина Василево, Радовиш и Берово – с. Нивичино, планина Голем Готен и Малешевските планини (нискостеблеста шума, смрека, грмушки и ниска вегетација);
2. Општина Прилеп – с. Бешиште, место викано Бешишки Рид (под контрола), друг крак кон с. Градешница (Опш. Новаци) и трет крак кон границата со Р. Грција (мешана шума, не се интервенира поради детонации);
3. Општина Прилеп и Кавадарци – помеѓу селата Царевиќ, Смолани, Радобил и Дрен (Опш. Прилеп) и Галиште и Трстеник (Опш. Кавадарци) (мешана шума и ниска вегетација);
4. Општина Крушево – Градска депонија кај м.в. Струнга (ѓубре, сува трева и нискостеблеста шума);
5. Општина Струга – делницата Струга – Калишта (трска и ниска вегетација);
6. Општина Штип – с. Чардаклија – с. Караорман (ниска вегетација);

Под контрола се два:
1. Општина Карбинци – с. Јунузлија (шума);
2. Општина Делчево – Градска депонија Острец (ѓубре);

Изгаснати се 16 пожари:
1. Општина Штип – помеѓу селата Драгоево и Селце (нискостеблеста шума, прнар и ниска вегетација);
2. Македонски Брод 1 – с. Грешница (мешана шума и ниска вегетација);
3. Македонски Брод 2 – помеѓу с. Црешево, Локвица и Крапа (деградирана дабова шума, грмушки и ниска вегетација);
4. Македонска Каменица – с. Ќосевица (борова шума);
5. Општина Прилеп – ул. Јоска Јорданоски (ниска вегетација);
6. Општина Струмица – с. Просениково (трска);
7. Општина Гевгелија – с. Миравци (грмушки и ниска вегетација);
8. Општина Радовиш – кај базенот во Радовиш (грмушки и ниска вегетација);
9. Општина Валандово – с. Јосифово (грмушки и ниска вегетација);
10. Општина Чашка – с. Оморани (грмушки и ниска вегетација);
11. Општина Росоман – с. Трстеник (напуштени лозови и овошни насади);
12. Општина Делчево – с. Звегор (ниска вегетација);
13. Куманово 1 – с. Градиште (ниска шума и ниска вегетација);
14. Куманово 2 – населба Баново трло (ѓубре);
15. Куманово 3 – населба Баново трло кај Туш маркет (ѓубре);
16. Општина Боговиње – кај Рио Компани (ниска вегетација).

Сите летови на главните аеродроми во Велика Британија се приземјени поради „откажување на радарот“ на контролата на воздушниот сообраќај. Илјадници патници се заглавени на пистите на најголемите туристички центри во Велика Британија, вклучувајќи ги Хитроу и Гетвик.

Патниците објавуваат фотографии на социјалните мрежи за покажат дека седат заглавени во авионите, а апликацијата „Флајтрадар“  покажува стотици авиони приземјени на лондонскиот аеродром  Хитроу.

Aпликацијата „Флајтрадар“  покажува стотици авиони приземјени на лондонскиот аеродром  Хитроу

Не работи ни таблата за полетувања иако станува збор за најголемиот аеродром во Европа. На неа стои порака за грешка на веб-страницата „Вашиот избор на лет не може да се најде“.

Други големи аеродроми за кои е потврдено дека се засегнати се Бирмингем, Гетвик и Лутон. Водечкиот снабдувач на услуги за контрола на воздушниот сообраќај во Велика Британија, НАТС, преку соопштение потврди дека има „технички проблем“ во центарот за контрола на воздушниот сообраќај во Свонвик.

„Како резултат на технички проблем, го ограничуваме бројот на авиони што летаат во зоната на контрола во Лондон за да обезбедиме безбедност. Се извинуваме за сите доцнења што може да ги предизвика ова. Нашите инженери работат напорно за да го решат проблемот што е можно побрзо и тесно соработуваме со авиокомпаниите за да помогнеме во минимизирање на прекините. Во оваа фаза не можеме да кажеме колку време ќе помине пред операциите да се вратат во нормала“, стои во соопштението од НАТС.

„Секој лет на југот на Англија моментално е заземјен поради проблеми со контролата на воздушниот сообраќај“, се пожали на социјалните мрежи патник заглавен на Хитроиу.

„Ние сме на лет на ’Изиџет’ од Лутон до Анталија, токму требаше да полетаме. Моментално седам со девојки на летот без поим што ќе се случи“, објави друг патник.

„Лондонскиот воздушен простор е целосно затворен… Нема полетувања од ниту еден од лондонските аеродроми“, стои во една од објавите на заглавените патници.

Преку соопштение аеродромот Гетвик извести дека техничкиот проблем значи дека во моментов нема полетувања додека се решава ситуацијата.

„Технички проблем што влијае на НАТС влијае на сите појдовни летови низ Велика Британија“, соопшти аеродромот на мрежата X.

„Моментално нема полетувања од Лондон Гетвик додека се решава ситуацијата. Работиме со НАТС за да ги продолжиме летовите што е можно побрзо. Дојдовните летови сè уште слетуваат на аеродромот. Патниците треба да го проверат статусот на своите летови со нивната авиокомпанија“, стои во соопштението од аеродромот Гетвик.

Меѓународните летови што пристигнуваат на аеродромот Западен Сасекс се одложени за еден час. Аеродромот Бирмингем, исто така, потврди дека бил засегнат од техничкиот проблем.

НАТС кажа дека денес било предвидено да има повеќе од 3.000 летови што поаѓаат од аеродромите во Велика Британија, што е еквивалентно на над 577.000 патници.