Одделот за сузбивање организиран и сериозен криминал – Единица за сериозен криминал и тероризам, до Основното јавно обвинителство за гонење организиран криминал и корупција – Скопје поднесе кривична пријава против Г.А.(27) од Штип поради „злосторничко здружување“, казниво по член 394 став 1 и „прикривање“ казниво по член 261 став 3 од Кривичниот законик

Според полицијата, тој во периодот од јули до септември 2018 година како член на злосторничко здружение што го формирале Р.П., А.Б. и Ж.Р. континуирано разменувал информации за пронајдени археолошки предмети.

,,Во периодот од 30.07 до 05.10.2018 година тој остварил контакти со Р.П. заради продажба на археолошки предмети кои претходно ги имал пронајдено, заради понатамошна препродажба. На 24.10.2018 година, со потврда за одземени предмети, од Г.А. биле одземени една бакарна фигура и една бакарна монета, кои се археолошки предмети и претставуваат добра под привремена заштита, културно наследство или природни реткости”, информира МВР.

Претходно, беше поднесена пријава против Р.П.(46), А.Б.(70) и Ж.Р.(65) и 6.11 уште 11 други лица поради постоење на основано сомнение за сторени кривични дела „злосторничко здружување“ по член 394 став 1, „присвојување на добра под привремена заштита или културно наследство или природни реткости“ по член 265, „изнесување, односно извезување во странство на добра под привремена заштита или културно наследство или природни реткости“ по член 266 и „прикривање“ по член 261 став 3 од Кривичниот законик.