Министерката за финансии, Гордана Димитриеска-Кочоска, денеска ја навреди пратеничката од СДСМ, Славјанка Петровска, велејќи дека нема право да зборува за мајки и семејства, за разлика од неа која е мажена, има семејство, има два сина.

„Пратеничке Славјанка Петровска, врз основа на што вие ги ставате в уста мајките што имаат деца и како знаете вие едно повеќечлено семејство колку треба да троши? Јас сум мајка на два сина и многу добро знам колку треба да троши едно 4-члено семејство. И научете во пописот што вие го направивте, едно просечно семејство е 3-члено, а не 4-члено. Во однос на грашокот, и јас сакам да купам од конзерва, ама не сум сама, четири члена сме. Мораме да одиме во најевтините маркети и да купиме замрзнат грашок. Тоа беше коментарот, зошто да купуваме грашоци кои се поскапи од 100 денари. Исто беше и за млекото. Некој може троши и по 18 литри, а некој воопшто не пие. Бадемовото вам ќе ви го оставам, вам ви треба, а не мене!“, рече министерката.

Петровска ја критикуваше министерката за нејзините ставови.

„Министерке, ако ја направиме логиката како што вие ја направивте, ќе видите дека 13 литри млеко не се доволни за едно 4-члено семејство, освен ако не ги заменувате со бадемово млеко“, рече Петровска и додаде:

„Ако имаше дно, вие го пробивте“, заклучи Петровска.

Претседателот на Владата, Христијан Мицкоски на денешната собраниска седница за пратеничка прашања истакна дека на јавниот обвинител Љупчо Коцевски му беше дадена шанса, но изминатиов период освен пресметки со неистомисленици во обвинителството и последен браник за одговорноста на минатата власт, друго ништо не се виде од обвинителот, и токму затоа се почна со постапката за разрешување, затоа што граѓаните треба да видат правда и борба против криминалот и корупцијата.

„На Коцевски му оставивме шанса и покрај тоа што бевме свесни дека можеби јавноста нема со наклоност да гледа на таа одлука да оставиме шанса на и така потонатото во кал обвинителство и судство. Дадовме шанса што може да направат, дали може да излезат од таа политичка матрица во која поединци се наоѓаат, не сите. Не влеговме како другите влади од прв ден да се пресметуваме со обвинителот и да правиме маратонски седници и да менуваме закони. Рековме да оставиме простор, но освен внатрешна пресметка со неистомисленици во рамките на обвинителството, која се случи како резултат на процеси во позадина како исплатените дневници за поранешните специјални обвинители, друго ние не видовме. Друго беа изговори“, изјави премиерот Мицкоски.

Додаде дека за да се покаже дека нема да биде „како до сега“ соочени се сите аргументи и констатирано е дека треба да се почне со барање одговорност од јавниот обвинител, кој од некои потези кои не личат на коректни и внатрешни пресметки во обвинителството, апсолутно ништо друго не прави.

„Почнавме постапка како влада, законски рокови и потоа сето тоа ќе дојде на собраниска седница. Има пратеници од политички партии во опозицијата наместо на страната на гласот на народот, застанаа во одбрана на Коцевски. Имајќи предвид дека довербата во обвинителството не е повеќе од 2-3%, тогаш се поставува прашањето чиј глас го претставуваат бранејќи го Коцевски. Јас лично имам дилема дали е тоа морално или осмислена политичка стратегија? Главните критики од извештајот на ЕК се во делот на владеење на право, имплементација на реформи во правосудството, тогаш кого штитат? Каква е пораката што се испраќа? После се чудат зошто довербата кај граѓаните опаѓа и кај опозицијата“, рече Мицкоски.

Тој нагласи дека Владата останува принципиелна на тоа што го говори.

„Рековме ќе дадеме шанса, но тоа што го гледаме е комплетно фијаско и последен браник на интересите на претходната владина коалиција, за што мора да има одговорност, а одговорноста е токму тука во Собранието бидејќи тој јавен обвинител се бира во Собрание. Мора да имаме недвосмислена борба против криминалот и корупцијата“, потенцираше премиерот Мицкоски.

Стоматолозите се загрижени за актуелните случувања во Стоматолошката комора на Македонија под водство на Маријан Денковски. Неговите одлуки и политики, како што велат, од ден на ден предизвикуваат сè поголеми проблеми и незадоволство помеѓу стоматолозите.

„Во демократско општество изразувањето на мислењето и дијалогот на интелектуалците може да биде само најефикасен начин за доаѓање до вистински конструктивни решенија на проблемите, за жал, за претседателот на СКМ, тоа е основ за поведување дисциплински постапки, санкции и прогон на своите колеги.

Д-р Маријан Денковски против своите неистомисленици поведува дисциплински постапки пред Судот на честа, кој се занимава со сè, освен со задачата што му е доделена со Законот за здравствената заштита. Во Комората владее целосен тоталитаризам и самоволие, се прогонуваат членови на здруженија и делегати, се воведуваат глоби за кои не постои никаква законска основа, нереално прикажани финансиски извештаи, ненаменско трошење на средствата од фондот за солидарност, се елиминираат одредени здруженија, a се фаворизираат други итн. Самоволието оди до тој степен што Комората не почитува пресуди на Уставниот и ма Управниот суд“, истакнуваат во информацијата.

Веруваат, како што велат, дека во државата постојат институции што ќе застанат на патот на таквото самоволие во Стоматолошката комора и ќе го вратат достоинството на докторите по дентална медицина. Бараат веднаш министерот за здравство да постапи во согласност со неговите законски надлежности и да стави крај на ваквото владеење.

„Поради сè погоре наведеното и предизвиканата материјална и нематеријална штета на угледот и честа на голем број колеги, но и финансиската штета на средствата од сите членови на Комората, сметаме дека најмалата работа што Маријан Денковски треба да ја направи е да си поднесе итна и неотповиклива оставка од функцијата на која е избран спротивно на статутот, а за што сè уште е во тек управна судска постапка“, потенцираат во реакцијата.