Грабеж се случил ноќта кон саботата во обложувалница во скопски Чаир во периодот од  00.18 до 04.40 часот, според информацијата на полицијата.

Од МВР за штетата велат дека едно лице со употреба на сила и погоден алат одзело осум кеш бокса, ги оштетило сите апарати, и одзело сеф кој бил под работниот пулт.

Извршен бил увид и се преземаат мерки за расчистување на случајот, се додава во информацијата на полицијата.

Социјалдемократскиот сојуз на Македонија обвини дека во Министрството за внатрешни работи бил распишан сомнителен тендер во вредност од речиси 4 милиони евра.

Портпаролката, Богданка Кузеска, вели дека се работи за договори од милионски износи кои им се доделени на фирми без никакви капацитети, без претходно релевантно искуство, па дури и без никаква историја на јавни набавки. Една од двете фирми, според зборовите на Кузеска, била отворена 20 дена пред тендерот, додека другата имала само двајца вработени.

„Фирмата ‘Ле Бранд Дизајн’ од Битола, модно студио со просечен годишен приход од едвај 20.000 евра и само двајца вработени, добива тендер од над 2 милиони евра за шиење специјални полициски униформи. До вчера двајца вработени шиеја фустани, денес со двајца вработени треба да опремат специјални единици! Кој е овде наивен? Фирмата „Памитекс Тим“ е регистрирана само 20 дена пред распишувањето на тендерот, без веб-страница, без историја на набавки, без транспарентност. Ете ваква фирма добива тендер од 1.710.000 евра. МВР ги отстранило сите критериуми што би овозможиле транспарентна и правична конкуренција – нема услов за претходно искуство, нема минимум приходи, нема проверка на реални капацитети“, рече Кузеска.

Партијата упати прашања до министерот Панче Тошковски, кој навистина ќе ги шие униформите? Каде ќе завршат парите на граѓаните? Кој ќе одговара ако униформите не стигнат, не бидат со потребниот квалитет, или ако бидат неупотребливи за полициските специјалци? Кој ќе одговара?

СДСМ повика на итна постапка од Јавното обвинителство за сомнежи за злоупотреба на службена положба, местење тендер и можно перење пари, поништување на тендерот и отворање на нова постапка.

Скопјани од Идризово уценувале мајка на затвореник да им даде пари за да и’ го штитат синот.

МВР за случајот извести дека е поднесена кривична пријава притив двајцата, А.Б.(31) и А.Р.(25), поради изнуда и лихварство.

Тие, додека ја издржувале казната во затворот, незаконски дошле до телефони и преку „месинџер“ барале од мајката на друг осуденик да им исплаќа по 1.200 евра месечно за нејзиниот син да добие гаранции и заштита во затворот и подобри услови за сместување.

При видео повиците, затворениците и’ покажувале на жената и како насилно се однесувале кон нејзиниот син, притоа уценувајќи ја дека доколку не им бидат исплатени пари ќе продолжат со насилството кон синот.

Пред два дена, браќата на двајцата изнудувачи, по претходен договор со мајката на затвореникот од која барале пари, дошле во Струмица за да се сретнат со неа и да им ја исплати бараната сума. Едниот ги зел обележаните пари и бил веднаш приведен, додека братот на вториот изнудувач се дал во бегство, но за брзо бил фатен и приведен.

Истовремено, извршен бил претрес во затворските ќелии кај изнудувачите и им биле најдени и одземени телефоните. Нивните браќа биле изведени пред судија и завршија во куќен притвор.