Вкупно шест лица се кривично пријавени во петокот од страна на Единицата за економски и компјутерски криминал при СВР Скопје, по превземени мерки и активности и соработка со Одделението за внатрешни истраги при Секторот за професионална одговорност во Царинската управа, поради тоа што се осомничени дека организирано продавале заплените стоки, како мобилни телефони, парфеми, златен накит и др
 

До надлежното Основно јавно обвинителство со кривична пријава се предадени вкупно шест лица, и тоа: С.Р.(38), Д.С.(33), Ј.М.(35) и З.К.(45) за сторено кривично дело „Злоупотреба на службена положба и овластување“, како и В.Р.(39) и С.М.(46) за сторено кривично дело „Прикривање“.

Имено, пријавените С.Р.(цариник), Д.С.(шеф на испостава Царинарница Скопје – од царинска испостава Блаце), Ј.М.(виш цариник Царинарница Скопје – царинска испостава Аеродром Скопје) и З.К. (самостоен советник за застапување пред судовите – Одделение за царинско управна постапка), во својство на службени лица вработени во Царинска управа на РМ, во текот на минатата и оваа година, ја злоупотребиле својата службена положба, и тоа во Царинска испостава „Аеродром“ Скопје каде од магацинот во кој се складира привремено задржаната стока по основа на откриени прекршоци, одземале мобилни телефони, парфеми, рачни часовници, патики, текстилна стока, техничка стока и златен накит, со што се стекнале со противправна имотна корист во износ од 1.527.000 денари и ја оштетиле Царинската управа.

Од друга страна, пријавените В.Р.(вработен во Агенција за вработување на град Скопје) и С.М.(вработен во мобилара „Мобил шоп“) дел од одземените предмети ги прикривале, иако знаеле дека истите потекнуваат од кривично дело

Одделението за внатрешни истраги при Царинската управа кое функционира во рамките на Секторот за професионална одговорност во текот на годинава во повеќе наврати извршила внатрешна контрола во магацинот во ЦИ Аеродром „Александар Велики“ Скопје, во кој била сместена привремено одземена стока по основ на сторени царински прекршоци. Притоа, било констатирано дека дел од одземена стока, како златен накит, патики, текстилната стока, поголем број на мобилни телефони, парфеми, часовници и друго, недостигаат или, пак, се заменети со копии.

Врз основа на наредби на судија на претходна постапка од Основен суд Скопје 1 Скопје, извршени биле претреси во домовите на С.Р. каде не се пронајдени предмети кои потекнуваат од кривичното дело, на Д.С. од кој е одземен еден мобилен апарат со картичка од Т-мобиле, кај З.К. од кој се одземени една СИМ картичка од операторот ВИП и една од операторот ОНЕ и кај В.Р.,инаку брат на првопријавениот С.Р., од кој со потврда за одземени предмети е одземен мобилен апарат и парфеми.

Со шесте пријавени лица, извршени се разговори, во кои истите го појасниле начинот на извршување на кривичните дела. Д.С. појаснил дека телефонот го купил од првопријавениот С.Р., Ј.М. појаснил дека од сефот со одземени телефони земал еден телефон кој го заменил со друг од кинеско потекло, по што подоцна го дал на З.К. да го продаде за поголема сума пари, додека З.К. се изјаснил дека телефонот го користел неговиот син. Во текот на испрашувањето В.Р. објаснил дека дека мобилниот телефон и парфемите му биле дадени од неговиот брат, додека, пак, шестопријавениот појаснил дека во неговата продавница за мобилни телефони од С.Р. му биле донесени три телефона за да ги продаде, при што едниот му го вратил, а двата ги продал на непознати лица, а воедно се изјаснил и дека во повеќе наврати од С.Р. му било понудено да купи и други предмети.

Исто така, од извршените разговори со четири лица за кои е утврдено дека користеле некои од предметните (мобилни телефони) и добиено е појаснување дека ги купиле преку оглас на Пазар 3 (во еден случај) или од посочената продавница за мобилни телефони и тие им биле одземени./крај/мф/сн

Извор: Макфакс