Вчера на улицата „Алија Авдовиќ“ во Скопје, патничко возило со скопски регистарски ознаки, управувано од 46-годишен маж од село Сингелиќ, скопско, удрило во шестгодишно дете од селото.

Детето се здобило со тешки телесни повреди и со друго возило било пренесено во комплексот клиники „Мајка Тереза“ каде му била укажана лекарска помош.

Полицијата извршила увид.

Сообраќајка помеѓу трактор и три возила се случила синоќа на магистралниот пат Струмица-Граничен премин „Ново Село“, на место викано „Леска“.

МВР соопшти дека во сообраќајката учествувал трактор со струмички регистарски ознаки, управуван од Ј.З.(40) од Ново Село, патничко возило „форд фокус“ со бугарски регистарски ознаки, управувано од М.К.(55) од село Секирник, патничко возило „мерцедес“ со струмички регистарски ознаки, управувано од В.Т.(50) од Струмица и патничко возило „фолксваген шаран“ со бугарски регистарски ознаки, управувано од И.И.Р.(50) од Петрич, Република Бугарија.

Со тешки телесни повреди се здобил возачот на тракторот, кој по укажаната лекарска помош со амбулантно возило бил пренесен во Комплексот клиники „Мајка Тереза“ во Скопје. Додека, со телесни повреди се здобиле возачот на возилото „форд фокус“ и сопатникот во истото возило, С.В.(55) од Струмица. Увид на местото извршила екипа од СВР Струмица.

Пет лица со повреди биле пренесени во болница по сообраќајна несреќа што се случила вчера на улицата „Кемал Сејфула“ во Скопје.

Во несреќата учествувале „југо“ и „пежо“, управувани од скопјани, а во второто возило имало и деца на возраст од десет и осум години.

Полицијата соопшти дека децата, возачот и совозачот на „пежото“ со возило на Итната медицинска помош биле пренесени во Ургентен центар при комплексот клиники „Мајка Тереза“, каде им биле констатирани телесни повреди и им била укажана лекарска помош.

Кај триесет и седумгодишниот возач на „југото“ биле констатирани тешки телесни повреди и со возило на Итната медицинска помош бил пренесен во Градската болница „Св.Наум Охридски“.