Посебен тим нуркачи од Охрид вчера попладнето изврши ново подводнo снимање на бродот „Илинден“ што во саботата потона во Охридското Езеро, при што се удавија 15 бугарски туристи

Снимањето беше спроведено на барање на Комисијата што работи на утврдување на причините за несреќата, по забелешките на некои од членовите дека претходните видео-записи од „Илинден“ на места биле заматени и според нив не може да се добијат потребните податоци во истрагата.Бугарскиот експерт во Комисијата, Георги Илиев, вчера најави дека можно е „Илинден“ денеска и утре да остане на дното на езерото. Според него, „Илинден“ треба да биде извлечен неоштетен на суво, а временските услови тоа не го дозволуваат.Денеска во Охрид се очекува да пристигне заменик-главниот обвинител на Бугарија, Камен Ситнилски, кој вчера во Скопје се сретна со македонскиот државен обвинител, Љупчо Шврговски.Несреќата со потонувањето на бродот „Илинден“ се случи во саботата во 10 часот и 30 минути, на 254 метри од брегот на длабочина од 6 метри, кај Авто-кампот „Елешец“. На бродот кој сообраќаше на релацијата Охрид – Свети Наум, имало 57 патници, од кои 42 ја преживеаја несреќата.