На локалниот пат село Горно Орашје – Тетово, во попладневните часови на 17 јули се случил посериозен сообраќаен инцидент во кој тетовец со автомобил влетал во поголема група пешаци.

Како што информираат од МВР, 61-годишник од тетовското село Мала Речица управувајќи автомобил „фолксваген голф“, удрил во десетмина пешаци од неколку села во околината на Тетово, на возраст од 46 до 76 години.

Во незгодата со тешки повреди се здобил еден од нив, 75-годишен жител на селото Јажинце. Тој бил пренесен во Клиничката болница во Тетово.

Останатите пешаци се здобиле со полесни повреди и пуштени се на домашно лекување.

Жител од Скопје на 17 јули во полиција пријавил дека истиот ден во ресторан во трговски центар во главниот град бил физички нападнат од двајца вработени во ресторанот, инаку кинески државјани.

Според пријавата, нападот уследил по недоразбирање во врска со нарачка на храна.

Како што информираат од МВР, еден од кинеските државјани со остар предмет се обидел да го нападне скопјанецот, а другото лице фрлало по него со различни предмети.

По преземени мерки, Кинезите биле приведени во полициската станица во Карпош и по целосно документирање на случајот против нив ќе биде поднесена соодветна пријава.

Управител на фирма е обвинет за злоупотреба на средства од ИПАРД-програмата на Европската Унија. Тој добил 250.000 евра од Агенцијата за финансиска поддршка на земјоделството и руралниот развој за плаќање 50 отсто од вредноста на опрема, но тој парите ги уплаќал на фирми блиски до него, соопшти скопското Обвинителство. Лицето е осомничено за злоупотреба на службената положба и овластувањето и за измама на штета на средства на европската заедницa, а делата ги сторил во период од 2015 до 2017 година.

Обвинетиот 32-годишен штипјанец кривичното дело го извршил како управител на правното лице „Балкан екофруит“ ДОО Свети Николе, каде што содружник е и правното лице „Агропионер“ ДОО Скопје, управувано од државјанин на Саудиска Арабија.

„Употребувајќи средства спротивно од одобрената намена за која се добиени од Агенцијата за финансиска поддршка на земјоделството и руралниот развој, како и со искористување, пречекорување и неизвршување на своите овластувања и должности, обвинетиот му нанел штета на оштетеното правно лице во кое бил управител, и тоа во вкупен износ од 69.825.499 денари. Обвинетиот со образложение за потреба и користење средства од ИПАРД-програмата склучил договор со Агенцијата за финансиска поддршка на земјоделството и руралниот развој за користење на средствата за плаќање 50 отсто од вредноста на опремата, со што добил парични средства во износ од 14.989.596 денари. Истовремено, од Стопанска банка АД Скопје за долгорочно финансирање мултивалутна кредитна рамка подигнал парични средства во износ од 1.600.000 евра. Но, наместо во согласност со договорот паричните средства од ИПАРД-програмата да ги трансферира на сметката на правното лице ‘Балкан екофруит’ ДОО Свети Николе во Стопанска банка АД Скопје во согласност со договорот за долгорочно финансирање заради наплата на дел од кредитот, обвинетиот без согласност на правното лице содружник ги трансферирал средствата на сметка на правното лице ‘Балкан екофруит’ ДОО Свети Николе во Комерцијална банка АД Скопје, од каде што средствата се уплатувани на правни лица блиски до него по разни основи во вкупен износ од 6.406.206 денари. Остатокот од паричните средства во износ од 8.583.390 денари тој ги исплатил на други правни лица за тековни фактури по разни основи“, соопштија од Обвинителството.

Обвинетиот во својство на управител, без согласност на содружникот правно лице, електронски одобрил и исплатил шест трансакции во вкупен износ од 13.720.147 денари по што испорачувал разни материјални добра на правното лице кон други правни и физички лице во вкупен износ од 15.690.491 денар за кои изготвил само испратници и приемници, без да преземе дејства за наплата на побарувањата.

Обвинетиот исто така склучил и 36 договори за откуп на овошје и четири договори за деловно-техничка соработка – заедничко производство на домати, притоа не вршејќи наплата на побарувањата и обврските од нив, со што му нанел штета на правното лице во износ од 2.188.873 денари.

Во истиот период, обвинетиот, без согласност на содружникот, дозволил влез и производство во просториите на фабриката „Балкан екофруит“ ДОО на други правни лица од кои не ги наплатил закупнината, платата за вработените и другите режиски трошоци, со што му нанел штета на правното лице во висина од 23.236.392 денара.