Апелациониот суд денеска му го продолжи притворот на Бајруш Сејдиу за случајот Пепел 2, во која на кумановскиот бос му се суди за малверзации во повеќе кумановски фирми

Претседателот на Апелација, Јордан Митриновски, изјави дека во редовна постапка денеска одлучувале за притворот на Сејдиу и одлучиле да му го продолжат.„Советот по службена должност оцени дека притворот на Бајруш треба да му биде продолжен. Нагласувам дека за барањето за притворот се одлучуваше денеска, затоа што предметот природно си дојде на дневен ред за работа во судот. Претходно решававме за барањето за гаранција“ вели Митриновски.Моментално во кривичниот суд во Скопје во тек се завршните зборови за овој случај, во кој е обвинет Сејдиу. Одлуката на Апелациониот суд да го пушти Сејдиу во домашен притвор со гаранција од 1,4 милиони евра предизвика бројни реакции во јавноста.Врховниот суд ја преиначи оваа одлука на апелациониот суд со што Бајруш остана во притвор. Потоа следеа реакции од двајцата претседатели на Врховниот и Апелацискиот суд за тоа која одлука е законска.Претседателот на Апелација и покрај обвинувањата дека одлуката на Врховен е незаконска, идниот ден излезе со став дека Апелација како понизок суд ќе ја почитува одлуката на Врховен. Сега Митриновски тврди дека овие реакции не влијаеле врз денешната одлука на Апелација.