По апсењето на сопственикот на А1 телевзија, Велија Рамковски и управителите на фирмите кои се наоѓаат на Перо Наков, МВР во соработка со Управата за јавни приходи и финансиската полиција денеска ја разјаснува, според нив, криминалната шема на Велија.

Десет фирми нелегално заработиле околу 18 милиони евра, а со неплаќањето на данок, државниот буџет го оштетиле за околу четири милиони евра. Полицијата ги откри во операцијата под оперативно име „Пајажина“.Од анализите на документацијата и се друго што беше запленето на 25 -ти минатиот месец полицијата открила злосторничко здружување, перење на пари и затајување на данок.„Од обезбедените докази, утврдено е дека еден ден од нелегално остварените приходи, пријавените ги исплаќале на вработени во наведените друштва, без да бидат платени законски предвидените придонеси. Во истиот период, пријавените преку однапред направен план, намерно во неликвидност ги довеле и шестте правни субјекти и тоа „Време Еч“, „Синим“, „Тргокос“, „Стратус“, „Време Трејд“ и„Акс-стра“ со намера да ги оштетат доверителите кои не успеале од нив да наплатат побарувања во износ од близу 140.000.000,00 денари, бидејќи целокупниот имот на наведените друштва бил префрлен без економски основ и реален доверително – должнички основ на други друштва кои ги контролирале пријавените“ изјави портпаролот на полицијата Иво Котевски.Освен овие фирми за нелегална заработкa биле користени А1 плус, Трго Ком (поранешна Б1), А2, Хедис маркети и Хедис.„Досега е констатиран неевидентиран промет на добра и услуги, издадени фактури со неверодостоен промет кои не се евидентирани кај издавачите на фактури, а се евидентирани кај примателите, издадени фактури на други даночни обврзници со неверодостоен промет, кои  не се евидентирани во деловните книги. Врз основа на ова е утврдена даночна основица, односно станува збор за нелегален приход од 1,74 милијарди денари поточно во евра 17,479 милиони евра.“ рече директорот на УЈП, Горан Трајковски.Сопственикот на А1 телевизија, Велија Рамковски  синоќа беше уапсен во телевизијата заедно со директорката на А1 телевизија, Анета Кочишки, братот на Велија Рамковски, Амди Рамковски, најстарата ќерка на Рамковски, Ѓултен Џемаили една од управителките на фирмите, во чиј стан во Чаир беа најдени пари и документи и други управители фирми.Полицијата поднесе кривични пријави против 23 физички лица кои биле вмешани во криминалот со фирмите кои се наоѓаат на улицата Перо Наков.Од нив 16 се приведени, а седум се во бегство. Меѓу осомничените има и петмина странски државјани, четворица се од Косово и еден турски државјанин. Приведените моментално се наоѓаат пред истражен судија кој треба да реши дали ќе им одреди мерка притвор или пак ќе се бранат од слобода.Освен кривичните пријави за физичките лица, кривични пријави се поднесени и против 10 правни лица, односно фирми.Пред неполн месец телевизијата А1 објави дека полицијата извршила упад во нивните простории без да објасни за што се работи. Главниот и одговорен уредник Младен Чадиковски изјави дека вработените буквално биле заробени и не им било дозволено да влегуваат и излегуваат од дворот на телевизијата.Од МВР тогаш ги демантираа тврдењата на А1 дека им било оневозможено движењето на вработените. МВР тврдеше дека полицијата не извршила упад во телевизијата и дека не се работи за акција, туку за асистенција на финансиската полиција и на екипа на УЈП кои треба да извршат увид во работењето на фирми на сопственикот Велија Рамковски, кои се наоѓаат на истата адреса со телевизијата А1./крај/фф