Јасмин Лесковица е осуден на 12 години затвор за убиство кај Универзална сала во Скопје. За истиот настан, но за насилство, му се судеше на Харун Хаџибулиќ кој доби една и пол година затвор

Ова е одлуката на судскиот совет во Основниот суд 1 во Скопје. „Сега ако си задоволен може да се смееш” , му кажа по пресудата Јасмин Лесковица на Хаџибулиќ. Пресудата најтешко ја доживеа таткото на Лесковица кој обвини дека пресудата е изнудена и дека неговиот син е наместен од адвокатот на Хаџибулиќ. Пред судот таткото на осудениот му се закануваше на адвокатот.„Се гледа дека се исплашени дека некој им се заканувал дека пресудата е местена. Очекувавме ослободителна пресуда оти нема никакви докази”, рече таткото на Лесковица. Додека адвокатот на Харун Хаџибулиќ даваше изјава за медиумите, тој му се доближи и почна да го навредува. По кратко кошкање сите си заминаа. Лесковица е осуден за убиство на Мирсад Кријешторац. Во зградата пред Универзална сала требало да биде отворен стриптиз бар на Кријешторац, Лесковица и Хаџибулиќ. На 15-ти март минатата година пред влезот на зградата тројцата се скарале и биле испукани пет куршуми со кои бил убиен Криешторац. Сега осудените се бранеа дека биле нападнати и дека се пукало во самоодбрана. Дел од сведоците се плашеа да сведочат оти имале закани за што писмено ја известија судиката.