Секторот за внатрешна контрола и професионални стандарди при МВР до надлежното ОЈО поднесе кривична пријава против Ј.Г. вработена во МВР, осомничена дека ја злоупотребила службената положба и овластувања

Според пријавата таа извршила бришење на нејзини кредити и административни забрани од плата. На тој начин пријавената го одбегнала отплаќањето на кредитите. Пријавената подигнала кредит пред 6 години во износ од 110.000 денари а еден од жирантите и била М.Р. исто така вработена во МВР.  Врз основа на административна забрана се вршеле задршки за ратите од нејзината плата се до јануари 2007 година. Тогаш пријавената, со намера да не и се запира дел од платата за отплата на кредитот ги злоупотребила службените овластувања и извршила промени во компјутерската евиденција на кредитите во МВР и ја избришала административната забрана.Покрај ова Ј.Г. зела кредит во износ од 349.800 денари каде што исто така еден од жирантите и била М.Р. Бидејќи пријавената не исполнувала обврската за отплаќање на кредитот во 2008 година банката до МВР доставила акт за активирање на административна забрана. По направената контрола на референтот за кредити, во април 2010 година, откриено е дека предметниот кредит од платата на пријавената бил префрлен на платата на нејзиниот сопруг (кој исто така е вработен во МВР). Референтот за кредити повторно го вратил кредитот на платата на Ј.Г. а пак таа повторно го избришала внесениот кредит и уште еднаш го префрлила на платата на нејзиниот сопруг. Покрај овие два кредита пријавената зела кредит во висина од 100.000 денари и од уште една банка каде што како жирант повторно се јавува М.Р. Поради тоа што Ј.Г. не ги отплаќала кредитите банките поднеле до Основниот суд Скопје 2 тужби против Ј.Г. и нејзиниот жирант М.Р.