Црна хроника
Малолетникот осомничен за убиството во ГУЦ сè уште во бегство
Полицијата сè уште трага по шеснаесетгодишниот малолетник кој е осомничен за убиството на деветнаесетгодишниот Мухамед Али Јашари, кој настрада во петокот во училишниот двор на средното градежно училиште „Здравко Цветковски“.
Министерката за внатрешни работи, Гордана Јанкулоска вели дека ќе бараат малолетникот да одговара за убиство, но не се знае со каква квалификација ќе оди Обвинителот.„Иницијално нашиот предлог до Обвинителот е кривична пријава за убиство, сепак со каква квалификација ќе оди Обвинителот јас не би можела да кажам бидејќи тој го има последниот збор. Меѓутоа, важно е да испратиме една силна порака дека насилството во било која форма не смее и не може да се толерира“ рече Јанкулоска.Таа смета дека за да се намали насилството во училиштата треба поголема мобилизација на целото општество, а според неа, насилството своите корени ги влече од семејството и домот.„Сметам дека насилството своите корени ги влече можеби од најраната возраст и од онаму каде што се стекнуваат првите знаења односно се стекнува основата на воспитувањето, а тоа е семејството и домот. Секако дека целото општество има улога во воспитувањето на младите луѓе, тука пред сè мислам на педагозите, психолозите, наставниците, но не смее да се потцени и улогата на родителите бидејќи, како што реков, основните и првите знаења децата, уште пред да појдат на училиште, ги стекнуваат во кругот на семејството. Неопходно е да има една поголема мобилизација на општеството и да се едуцираат најмладите припадници на општеството дека секој проблем без разлика колку тој изгледа тежок и нерешлив, мора да се решава низ дијалог и толеранција“ вели Јанкулоска.Безбедноста во училиштата, според Јанкулоска, е во надлежност на градот или општината, а МВР презема мерки во однос на одржувањето на јавниот ред и мир и во делот на репресивниот дел ,односно тогаш кога ќе треба да се казнат сторителите. „Освен овој репресивен дел наша задача е да делуваме на превенција и едукација и токму тоа и го правиме и преку локалните совети за превенција и преку непосредни контакти и преку офицерите за превенција и голем дел од нив одржуваат предавања во голем дел на училиштата, но сепак сметам дека е неопходно да се оди кон една поширока општествена мобилизација“ вели Јанкулоска.Резултатите од обдукцијата од Институтот за судска медицина официјално не ги соопштуваат, велат дека ќе бидат готови за четири до пет дена.Последните неофицијални информации велат дека момчето починало од удар во пределот на срцето.Денеска во училиштето „Здравко Цветковски“ беше одржана комеморација за смртта на ученикот. Во среда Советот на Град Скопје ќе одржи вонредна седница за овој инцидент. Полицијата го уапси второосомничениот за учество во инцидентот, а истражен судија му одреди петнаесетдневен притвор.Според полицијата, причините за инцидентот биле банални. Ученикот кој го преживеа нападот, седумнаесетгодишниот Дарко имал недоразбирања со второосомничениот кој сега е во притвор и кој исто така е ученик во ГУЦ. И двајцата осомничени се од македонска националност.Пред неколку недели второосомничениот го нападнал Дарко пред неговата девојка со шлаканици во населбата каде што живее.Деветнаесетгодишниот Мухамед Али Јашари од Кондово во петокот се обиде да го спаси својот соученик – Македонец, но смртно настрада.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Ги претепал сопругата и мајка си: насилство во Скопје
Во полициската станица Кисела Вода вчера во 12.15 часот бил извршен службен разговор со К.С.(39) од Скопје.
Полицијата постапила по претходна пријава дека во семејниот дом на подрачјето на Карпош, тој физички ги нападнал неговата 36-годишна сопруга и неговата 60-годишна мајка.
Надлежните соопштија дека по целосно документирање на случајот ќе следува соодветна пријава.
Црна хроника
Починат скопјанец пронајден во просториите во кои работел
Вчера во 08:00 часот во СВР Скопје е пријавено дека во просторија на Бригадата за противпожарна заштита Скопје пронајден е починат вработениот З.А.(57) од с.Мралино, општина Илинден.
Лекар од Итна медицинска помош констатирал смрт без видливи траги на насилство.
По наредба на јавен обвинител телото на починатиот било дадено на обдукција, соопшти полицијата.
Топ
Уапсен кумановец на Табановце, шверцувал стари монети
Полицијата уапси кумановец на Граничниот премин Табановце, во неговото возило биле пронајдени стари монети.
Вчера во 20:18 часот на Граничен премин Табановце, на влез во државата, полициски службеници го лишија од слобода Ф.С.(39) од Куманово. При гранични проверки и контрола во возилото „фиат“ со швајцарски национални ознаки, кое го управувал, биле пронајдени и одземени 271 монети со различни големини и форми, кои потекнуваат од различни временски периоди.
Лицето е задржано во Полициска станица и за настанот е известен јавен обвинител. По целосно документирање на случајот, против него ќе биде поднесена соодветна пријава по член 266Б од Кривичниот законик – „внесување на противправно прибавени добра под привремена заштита, културно наследство и природни реткости“.

