Полицијата во петокот не запленила хероин, туку се работи за неутрална материја со којашто се меша хероинот. Според МВР, станува збор за измама меѓу две групи кои се занимаваат со трговија на дрога, односно за нивно меѓусебно подметнување.

Наместо хероин групата од Македонија се обидела да му подметне на нарачателот од Австрија неутрална материја, која нема никаква материјална вредност.Во петокот околу 13.30 часот припадници на единицата за недозволена трговија со наркотици пронајдоа пет килограми дрога, за која се претпоставуваше дека е хероин. Уапсени беа три лица во тоалетот на Новата железничка станица, каде требало да се случи примопредавањето на дрогата.Дрогата била сместена во куфер со двојно дно, а токму во тоа дно биле сместени пет пакувања обвиткани со селотејп трака.Купувачот од Австрија ја нарачал дрогата преку организатор кој што требало да ги организира групите за да ја испорачаат дрогата во Австрија.Куферот стоел на автобуската станица во Скопје два дена, од каде што требало да биде преземен и едно од лицата кое веќе имало купено карта за Виена да го однесе таму. Полицијата има индиции дека овие лица можно е да се замешани и со групата која подолго време шверцуваше хероин во Австрија и Германија.„Можно е да има и други замешани, истрагата е сè уште во тек, постојат одредени индиции дека и овие три лица се еден дел, огранок од таа група која се бавеше подолг период со шверц на дрога на подрачјето на Австрија и Германија“ вели портпаролот на полицијата, Иво Котевски.Од МВР сè уште не знаат за кое дело на лицата ќе им биде поднесена кривична пријава. „Се работи сè уште со лицата, станува збор само за траги од хероин, не станува збор за хероин, бидејќи најголемиот дел од тие пет килограми кои што се запленети се неутрална материја. Продолжуваме да работиме со овие лица и доколку биде документирано некое друго кривично дело против нив ќе следува соодветна кривична пријава“, вели Котевски.Дел од овие лица веќе и се познати на полицијата, претходно биле предмет на обработка токму за вакви слични кривични дела.