Вчера во СВР Велес бил пријавен пожар што избувнал во свињарска фарма на фирма во селото Долно Чичево, општина Градско.

Во пожарот угинале шест свињи, а причинета е и значителна материјална штета. Како што информира полицијата, поради вдишување чад, едно лице било пренесено во Општата болница во Велес, додека четири други лица побарале лекарска помош во болницата во Неготино, а три лица се јавиле на преглед во болницата во Кавадарци.

Пожарот бил изгаснат од страна на Територијалната противпожарна единица Велес. Увид на местото на настанот извршиле јавен обвинител, вешто лице и увидна екипа од СВР Велес. Причините за пожарот сè уште се утврдуваат.

Полицијата поднесе кривична пријава против Ј.Д. (37) и А.А. (46), двајцата од Кичево, поради постоење основи на сомнение за сторено кривично дело „обид за убиство“.

Како што соопшти СВР Охрид, двајцата се спроведени во Казнено-поправната установа „Затвор-Битола“ откако судија на претходна постапка им одредил мерка притвор во траење од 30 дена.

Настанот се случил на 4 јануари 2026 година, околу 14:45 часот, кога осомничените со нож го нападнале 39-годишниот Б.А. од Кичево, на земјен пат кај месноста „Сеферов бунар“, во близина на градот. По нападот избегале, но полицијата ги лишила од слобода истиот ден на улицата „Загорје“ во Кичево.

Повредениот бил пренесен во Општата болница во Кичево, а по укажаната помош, поради сериозноста на повредите, бил препратен во Градската општа болница „8 Септември“ во Скопје.

При претрес во домовите на пријавените, извршени со судска наредба, биле пронајдени и одземени ножеви, кои ќе бидат користени како доказен материјал во понатамошната постапка.

Тројца возачи од Охрид, Струга и Дебрца се приведени во изминатите два дена поради безобѕирно управување моторни возила под дејство на алкохол, информира Министерството за внатрешни работи.

На 18 јануари, во 03:55 часот на булеварот „Железничка“ во Охрид, полицијата го привела 33-годишниот Ј.С. од селото Лескоец, кој со своето возило „Ауди“ со охридски регистарски таблички изгубил контрола и предизвикал сообраќајна незгода. При алкотестирање му биле измерени 1,79 промили алкохол во крвта. Дополнително, било утврдено дека возел и покрај активна забрана за управување возило од „Б“ категорија. Против него ќе биде поднесена кривична пријава по член 297-а од Кривичниот законик – „безобѕирно управување моторно возило“.

Истиот ден, во 00:50 часот на улицата „Владо Малески“ во Струга, бил лишен од слобода 41-годишниот Р.Ј. од Вевчани. Тој управувал патничко возило „БМВ“, а при контрола кај него биле утврдени 2,37 промили алкохол во крвта. Тој веднаш бил исклучен од сообраќај и ќе се соочи со кривична пријава според истиот член.

На 17 јануари, по сообраќајна незгода во близина на струшкото Ново Село, полицијата го привела и 72-годишниот К.Д. од селото Требеништа, општина Дебрца. Алкотестот покажал исто така 1,79 промили алкохол. И против него ќе биде поднесена кривична пријава за безобѕирно управување возило.

Сите случаи се документираат.