Повеќе лица пукале кон четирите момчиња и постариот жител на село Црешево кои беа убиени во четвртокот вечерта во атарот на селото Смилковци кај езерото.

Ова го соопшти министерката за внатрешни работи Гордана Јанкулоска откако денеска го разгледале обдукцискиот извештај.

Според нивните информации, кон убиените било пукано од блиску со три типа на огнено оружје.

„Врз основа на направената обдукција потврдено е дека смртта кај петтемина убиени настапила како последица од повеќе прострелни рани кои кај четири од лицата се нанесени од непосредна близина, додека кај петтото лице од малку поголема оддалеченост.Според вештачењето се претпоставува дека е пукано од три локации и од три различни оружја. Поголем дел од чаурите се подигнати од лице место и се вештачат. Исто така, од страна на Министерството за внатрешни работи пронајдени се и одземени неколку возила врз кои се вршат вештачења, а можно е да биле поврзани со убиството“ соопштуваат од МВР.

Засега МВР не ги исклучува сите можности и варијанти, па дури и дека се работи за професионални убиства и дека убијците избегале надвор од државата. Министерството побарало од полициите во соседните држави, доколку имаат било каква информација за убиствата да ги информираат и да соработуваат.

Министерката вели дека до овој момент се уште не може да се каже дали убиството било меѓуетничко бидејќи полицијата не ја знае ниту етничката припадност на сторителите, ниту нивниот идентитет.

Таа уште еднаш упати апел да не се разгоруваат меѓуетничките односи. „Без оглед на тежината и сериозноста на кривичното дело не треба да дозволиме нарушување на меѓуетничките односи“ изјави Јанкулоска.

Таа ги повика граѓаните да соработуваат со полицијата и за време на собирите по повод големиот празник Велигден да не се предизвикуваат нереди и да не се изразува револтот на граѓаните преку протести.

Според неа, со ова сите полицајци би се ангажирале и би се концентрирале кон пронаоѓање на сторителите наместо да го обезбедуваат јавниот ред и мир.

Според  сегашните информации на полицијата, во населбата Радишани од каде што потекнуваат четирите убиени момчиња нема протести и не се најавени. Полицијата сепак е присутна во оваа населба. Во тек се погребните церемонии на убиените.

Граѓаните кои имаат било каква информација за убиствата може да се јават на телефонската линија 199 и да пријават доколу нешто знаат.

Засега полицијата само врши разговори со лица кои можеби ќе помогнат во расветлувањата на убиствата и оваа листа постојано се проширува, осомничени нема. Во текот на денешниот ден на службен разговор во полиција досега се повикани петнаесеттина лица кои би можеле да имаат некаква информација во врска напаѓачите, а се продолжува со интензивна оперативна работа така што можно е да бидат повикани и други лица. Повеќе информации не соопштуваат во интерес на истрагата и поради тоа што убијците се се уште на слобода.

Во четвртокот вечерта беа убиени Александар Наќовски, Цветанчо Ацевски, Кире Тричковски и Филип Славковски на возраст од околу 20 години од скопската населба Радишани и 45-годишниот Борче Стефковски од село Црешово додека ловеле риба на езерото кај Смилковци. Се уште не се знае кој и зошто ги застрелал./крај/фф