Бугарските менаџери во Фабриката за кабли Неготино, во 2010 година успеале да извлечат 1,6 милиони евра преку цесии за лажни побарувања и со признавање на непостоечки обврски од Фабриката. Шестмина од раководителите биле Бугари, а еден бил од Неготино.

„Иако знаеле дека АД ФКН Неготино е неспособно да ги исполнува доспеаните обврски, со пречекорување на својата службена положба и овластување не поднеле предлог за поведување на стечајна постапка, туку напротив, со склучување на нови договори за отстапување, односно цесии за лажни побарувања со ФКН ДООЕЛ и со признавање на непостоечки обврски, го довеле правното лице АД ФКН Неготино во состојба на презадолженост и притоа не превзеле мерки да ја сменат состојбата“ се вели во соопштението на МВР.

Секторот за внатрешни работи Велес до надлежното обвинителство поднесе кривична пријава против сите осомничени за “злоупотреба на службената положба и овластување“ и “предизвикување стечај со несовесно работење“, а против некои и за “помагање во извршување на кривично дело“.

Со ова групата ја оштетиле фабриката и нејзините доверители. Секторот за внатрешни работи Велес  како и Центарот за сузбивање на организиран и сериозен криминал при МВР и претходно во повеќе наврати против осомничените имаат поднесено кривични пријави за исти и слични кривични дела.

/крај/мвр/фф