Во Македонија и регионот безбедносно-политичката состојба е проценета како една од слабите алки и јас лично очекувам дека ќе имаме пожестоки акции и активности изведени на терористички план.

Ова го изјави пензионираниот професор на факултетот за безбедност, Иван Бабановски кој  учествуваше на отворањето на дводневниот Семинар посветен на борбата против насилниот екстремизам.„Ние го имавме Смилковци и јас очекувам дека ние ќе имаме уште неколку такви жестоки акции и би бил пресреќен како човек, како Македонец ако тоа не се оствари и нема да се срамам пред јавноста да кажам дека сум погрешил во моите проценки“ изјави Бабановски потсетувајќи ја јавноста на петкратното убиство кое се случи кај Смилковци кога беа убиени недолжни граѓани, а МВР го оквалификува ова како терористички чин.И Бабановски се согласува со таквата констатација, бидејќи со овој чин се испрати порака и се внесе страв меѓу граѓаните на Македонија.„Криминалците кога делуваат тие се прикриваат и тие немаат никогаш намера да бидат откриени и да бидат познати. Терористите ако не бидат во јавноста претставени со нивната акција како да не направиле акција. Во Смилковци се оставија такви жестоки траги да се знае дека е ова порака до граѓаните на Македонија, да им се внесе страв, а тоа покажува дека политичката безбедносна ситуација не е добра“ вели Бабановски.Според него, тероризмот мора да се гледа во корелација со организираниот криминал, за него тероризмот и организираниот криминал се сијамски близнаци.„Таа спрега на организиран криминал и тероризмот е постојана и таа спрега меѓу криминалот, тероризмот и политиката на Балканот дава резултати затоа што криминално терористички групации носат на позиции на власта, криминализирани политичари кои понатаму само овозможуваат услови да може несметано да цвета криминалот,а тероризмот е само шлагот на организираниот криминал. И тероризмот и организираниот криминал се сијамски близнаци, нема тероризам без организиран криминал и нема тероризам без финансии, нема тероризам без валкани пари. Го сменивме директорот на агенцијата за борба против организираниот криминал само затоа што најави една невидена активност и спрега на тероризмот, на радикализмот особено со оној исламски предзнак и парите кои доаѓаат во Македонија. На тој начин нема да дадеме придонес во антитерористичката коалиција која јас лично ја поддржувам“ вели Бабановски.

Според него, Во Македонија имало три кампа за обука на припадници на Ал каеда.

„Од една етничка партија 25 активисти беа на обука во Техеран во камп во кој се обучуваат терористи. Еден од лидерите на таа партија беше во Ком кој е духовен центар на Шиитите и таму се обучуваше за духовен пропагатор и духовен водач на структури кои исто така имаат допирни точки со тероризмот“вели Бабановски./крај/фф