Двајца Македонци се вмешани во меѓународиот криминал со платежни картички, соопшти македонската полиција која учествуваше во операцијата „Кардшоп“ која ја водеше американското ФБИ.

Групата во која биле вмешани Американци, граѓани од повеќе европски држави, од Азија, од Австралија, незаконски прибавувале податоци од платежни картички и истите за одреден паричен надомест ги нудат на продажба преку повеќе веб страници.

Како што соопштуваат од МВР, Македонците биле регистрирани членови и заедно со останатите лица неовластено нуделе на продажба преку интернет податоци од платежни картички и банкарски сметки, сопственост на странски државјани.

Во тек се разговори со Македонците за кои постои сомнение дека биле членови на меѓународната криминална група, а при претрес Единицата за компјутерски криминал извршен во координација со ФБИ пронајде компјутери и компјутерска и мемориска опрема.

Во вторникот во САД приведени беа 11 лица државјани на САД, како и по едно лице во Италија, Норвешка и Јапонија.

Меѓународната операција во Австралија, Канада, Данска и Македонија се сé уште во тек, со цел утврдување и на други лица инволвирани во криминалните активности, како и идентификување на нивни соработници или соизвршители.

„Ваквите компјутерски измами најчесто се извршуваат на глобално ниво преку интернет преку средствата за масовна комуниакција и во таа смисла ние постајано инвестираме во капацитетите на македонската полиција за да можеме така како што беше случај овој пат, да дадеме сопствен придонес во погоемите акции кои се одвиваат на глобално ниво“ изјави Јанкулоска.

И веб страницата на МВР ја нападнаа хакери, но немаше бришење на податоци, пробивање во компјутерскиот систем. МВР трага по лица кои го извршиле нападот

„Потребно е одредено време да се направи размена на информации, врз основа на кои ќе може да се детектира од каде доаѓа нападот, а потоа да се идентификува сторителот. Во моментот кога ќе биде ова завршео ќе одиме со соодветна кривична пријава“ изјави Јанкулоска./крај/мвр/фф