Триесет и деветгодишен тетовец е повреден со огнено оружје во стапалото, откако непознати лица пукале во него, околу 2.30 часот во петокот.

Од Клиничка болница во Тетово било пријавено дека кај нив е донесен Љ.Д.(39) од Тетово со прострелна рана во пределот на стапалото, а по укажана лекарска помош тој е пуштен на домашно лекување.

Полицијата излегла на местото на настанот, а од извршениот разговор со Љ.Д. дознале дека околу 2.20 часот на ул. „Вон Вардарска“ во Тетово, додека тој седел во дворот од куќата на неговиот брат, забележал како се доближуваат повеќе непознати лица.

Се приближил до вратата да види кој доаѓа, а непознатите лица од пиштоли почнале да пукаат кон Љ.Д., при што со еден истрел го повредиле.

Извршен е увид, при што се пронајдени девет испукани чаури, а од пукањето оштетени се две патнички возила, сопственост на Љ.Д. и на А.А.(44), паркирани пред вратата од куќата.

Се преземаат мерки за откривање на сторителите и расчистување на случајот./крај/со/бб