Со распит на обвинетите, во понеделник, почна најголемиот судски процес во Македонија „Калдрма“, односно продолжение на „Змиско око“, во кој им се суди на 87 вработени на патарините.

Роднини на обвинетите од сите градови во Македонија стигнаа во судот за да ги видат своите најблиски кои во понеделникот седнаа на обвинителна клупа.

Големата судница во Врховниот суд беше претесна за да ги собере сите роднини, па дел од нив незадоволни останаа пред вратата.

Додека обвинителот читаше дел од обвинителниот акт кој е напишан на 400 страници. еден од обвиниетите стана со цигарите и телефонот во раце за да излезе и да оди во тоалет.

Судијата не го дозволи тоа, го прекори обвинетиот и му рече да седне на неговото место.

Првообвинетиот Ирфан Идризи во својот исказ ги негираше делата за кои се товари и тврдеше дека ниту бил поврзан со групата, ниту, пак, ги знаел дел од припадниците на групата.

Адвокатот Мирослав Вујиќ, судскиот процес го нарече пародија: „Ова е уште поголема пародија од `Змиско око`. Видоа што се случи со овие процеси и повторно продолжуваат со такви маратонски судења“.

Адвокатската на првообвинетиот смета дека нема ниту еден материјален доказ, ниту, пак, фактичката состојба ја потврдува вината на обвинетиот.

По паузата продолжува распитот на останатите обвинети.

Судскиот процес „Калдрма“ е продолжение на полициската акција „Змиско око“, во којшто им се суди на 87 инкасанти од јавното претпријатие „Македонија пат“ за проневера од над два милиони евра.

Според МВР, инкасантите им издавале лажни фискални сметки за возачите кои сами ги изработувале, а во нивните домови МВР пронајде програми за изработка на сметки, принтери, оригинална хартија./крај/мф/фф