Четворица од приведените, осомничени за убиството на Маријан Тушевски и Кире Јанев, добија триесетдневен притвор.

Меѓу притворените е и шефот на обезбедувањето на поранешниот министер за внатрешни работи, Зоран Трајковски, а дел од медиумите пренесуваат дека Бошковски кој моментално е во затвор за друго дело добил 30-дневен притвор и за ова дело и дека ќе биде префрлен од затворот „Идризово“ во „Шутка“.

Истражниот судија им одредил притвор и на петмината осомничени кои се во бегство, меѓу кои и Србите кои се осомничени дека се директни извршители на убиството.

„Против тројца обвинети Јавниот обвинител не поднесе предлог за определување на мерка притвор, а против останатите обвинети по нивното сослушување и дадениот исказ пред истражен судија ЈО го повлече предлогот за определување на мерка притвор“ соопштуваат од Судот.

Српските државјани Предраг Чубрило, Милан Илиќ и Милорад Ковачевиќ се осомничени дека се директни извршители на двократното убиство, но сега се во бегство.

Бошкоски кој беше министер во 2001 година, кога се случи убиството, неговиот шеф на обезбедувањето Зоран Трајковски, Сашо Јовановски викан Тупан, вработен во секторот за набљудување и следење при МВР и други полициски функционери се осомничени дека знаеле за убиството и го помагале.

Марјан Тушевски и Кире Јанев беа убиени на 10-ти јули 2001 година. кога излегувале од кафулето „ЗУ“ во скопската населба Капиштец. Прво со 11 куршуми беше убиен Тушевски, а потоа напаѓачите пукале и кон Киро Јанев кој се обидувал да избега./крај/фф