Околу 26 килограми опојна дрога марихуана како и 33 килограми риба белвица, се пронајдени и одземени во синоќешната акција што во близина на караулата кај Радожда, ја изведоа полициски службеници од граничната полиција во координација со полициската станица од Струга, јави МВР.

Во средата вечерта околу 22 часот, кај граничниот камен број 42, во близина на караулата Радожда, полициските службеници ги приведоа лицата З.Ш.(42) и Д.П.(48 ) двајцата од Радожда.

Полицијата ги фатила кога на брегот се приближувал чамец во кој двајца албански државјани превезувале 20 пакувања со околу 10 килограми марихуана и две вреќи со 22 килограми риба белвица.

Забележувајќи ги полициските службеници, албанските државјани скокнале од чамецот и со пливање побегнале, притоа фрлајќи ги во вода вреќите полни со риба белвица.

При извршен претрес кај З.Ш. била пронајдена црна платнена торба со околу 16 килограми спакувана опојна дрога марихуана, додека кај Д.П. биле пронајдени 11 килограми белвица и крап, и огромни количини на рибарска мрежа.

Двете приведени лица, се добро познати на службата, кои, во изминатиов период, на сличен начин криумчареле риба и недозволено тргувале со опојна дрога, за што им биле поднесувани соодветни кривични пријави.

Од страна на полициските службеници се преземааат дополнителни мерки за целосно расветлување на настанот по што ќе биде поднесена кривична пријава./крај/со/бб