Девојка била киднапирана и претепана од поранешното момче и оставена во бесознание во Чаир.

Поднесена е кривична пријава против лицето Ш.И.(31) од Скопје, поради основано сомневање дека противправно ја лишил од слобода, а потоа и нанел тешки телесни повреди на оштетената Д.М. (32) од Скопје.

Истражен судија на пријавениот му одреди мерка притвор во траење од 30 дена.

Двајцата подолго време биле во интимна врска, а откако прекинале Ш.И. не се согласувал со тоа.

На почетокот на минатиот месец, односно една вечер, кога оштетената била на автобуска постојка на бул. „Крсте Мисирков“ сакајќи да се качи во автобус, пријавениот дошол со патничко моторно возило и со употреба на сила ја внесол во возилото, а потоа ја однел во шумата над скопска Гази Баба.

Таму со дрвен стап и задал неколку удари по главата и телото, нанесувајќи и фрактури по рацете, телото и рбетот, од кои што повреди оштетената паднала во бесознание.

По некое време, Ш.И. ја освестил, по што ја качил во возилото ја однел во населба Чаир, каде ја оставил на улица без да и пружи помош упатувајќи се во непознат правец.

Д.М. по мобилен телефон повикала такси возило и се упатила во Градската општа болница „Св. Наум Охридски“, каде што е девојката била задржана, а притоа се констатирани тешки телесни повреди.

По ова во службени простории на СВР-Скопје извршено е препознавање по фотографии, при што оштетената со сигурност го посочи Ш.И. како сторител на кривичните дела.

Инаку, пријавениот уште како малолетник е регистриран како сторител на имотни деликти, за што од надлежен суд има изречени мерки, а откако станува полнолетен поднесени му се девет кривични пријави за сторени имотни деликти, спречување на службено лице во вршење службено дејство, прикривање и загрозување на безбедноста во сообраќајот, за што во 2003 и 2009 година од надлежен суд му се изречени две мерки затвор во траење од две години и шест месеци./крај/со/бб