Министерството за внатрешни работи откри случај на неoвластено производство на марихуана, при што се запленети вкупно 109 стебла од растението „канабис сатива“.

Како што истакна директорот на Бирото за јавна безбедност Љупчо Тодоровски, по претходно добиено сознание дека во атарот на село Бадар, скопско, на десниот брег од реката Пчиња на три локации оддалечени по околу 15 метри една од друга, има засадено стебла со растението канабис сатива, се превземени соодветни мерки за откривање на лицата кои ги засадиле и одгледувале насадите со растението „канабис сатива“.

Насадите се откриени во среда, при што е констатирано дека дрогата е одгледува на површина од 400-500 м2. На лице место документирани се две лица, кои се лишени од слобода, и по извршеното легитимирање утврдено е дека се работи за А.Н. (31) и Љ.Д. (43), двајцата од Скопје.

На споменатата локација пронајдени се и одземени предмети со кои се вршело полевање на насадот. При извршените претреси на лицата како и во нивните домови и други простории пронајдени и одземени се: десет гранки од марихуана, целофанска кесичка со марихуана, полиетиленска кеса со семки од марихуана, полиетиленска кесичка со непознат прашок жолта боја, една тегла со цвет од марихуана, поголема полиетиленска кеса со марихуана, целофанско пакување со семки од марихуана и една полиетиленска кеса со НН прашкаста материја.

Против двете приведени лица ќе биде поднесена кривична пријава за “неовластено производство и пуштање во промет на наркотични дроги, психотропни супстанции и прекурзори“. Дополнително, се утврдува и евентуална вклученост и на други лица во одгледувањето на дрогата. /крај/мф/ач