Црна хроника
Судење Детонатор: Обвинет тврди дека правел синџирчиња со куршуми
Сите обвинети во случајот „Детонатор“ кои во вторник даваа исказ пред судот, ги негираа обвинувањата за коишто се товарат.
Обвинетиот Тони Лесански, кој работел како професор во виничката гимназија, тврди дека не бил член на криминална група, ниту дека учествувал во некои договори за вршење кривични дела.
Дел од обвинетите кои се од Виница ги познавал, додека за другите рече оти воопшто не ги познавал и дека немал никаков контакт со нив.
Тврди дека воопшто не го познавал и немал никави контакти или расправии со Драганчо Стојменов од Кочани и дека воопшто не учествувал во нарачката на убиството на Стојменов.
Пиштолот што го најде полицијата во неговата куќа, како што раскажа го чувал како трофеј, а куршумите ги купувал од тезги во Бугарија за изработка на синџирчиња, сувенири.
Исказ пред судот даде и братот на Оливер Алексовски, поранешен пратеник од ВМРО-ДПМНЕ од Крива Паланка. Далибор Алексовски, исто така, ги отфрли сите обвиненија и рече дека освен Симеон Михаилов кој е во бегство, никој друг од обвинетите не познавал.
Го отфрли кривичното дело „перење пари“ и тврдеше дека негов пријател од детството кој бил во Париз му праќал пари преку Вестерн Унион. Првин му пратил 5.000 евра, пари кои претходно Алексовски му ги позајмил, а потоа му пратил уште 3.000 евра за да му уплаќа ливчиња за спортска прогноза во кладилница во Крива Паланка.
Иако во одбраната пред истражниот судија Алекосовски кажал дека знае сé за набавката на покер апарати, за покер апаратите во денешната одбрана тврдеше дека не знае ништо освен дека некој негов пријател од Штип набавувал покер апарати од Чешка преку негова фирма за што имал платено данок.
Овие стотина апарати биле сместени во магацин во Крива Панка, и Алекосвски ги имал видено кога поминувал покрај магацинот.
И обвинетиот Милан Арсов тврдеше дека нема никаква врска со учество во криминална група и дека не е виновен за „изнуда“. Тврдеше дека ниту земал изнуда, ниту ги присилно им земале пари граѓаните.
Тој во неговиот исказ ја спомена агенцијата за обезбедување „Титан груп“, преку која, според обвинението, организаторите на криминалната група со закани и присили им наложувале на лица од Кочани да им исплаќаат надомест за обезбедување на објектите, спротивно на нивната волја.
Арсов рече дека оваа агенција ја обезбедувала летната дискотека „Тропикана“ која ја поседувал од мај до август 2010 година. Во неговата дискотека во Кочани доаѓале двајца обезбедувачи од агенцијата, само кога имало концерти. Им плаќал од 750 до 1.000 денари од вечер, но немал склучено никаков договор со нив. Распитот на обвинетите продолжува. Од вкупно 16 обвинети досега исказ имаат дадено девет лица, а двајца се во бегство.
Обвинителството ги гони за обид за убиство, злосторничко здружување, перење пари, затајување данок, лихварство, насилство и измама.
Обвинетите се товарат дека трипати се обиделе да го убијат Драганчо Стојменов, двапати со подметнување експлозив под неговиот автомобил, а третиот пат дека првообвинетиот Игор Горански се обидел да го убие со пушка./крај/мф/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Две семејства во Штип се тепале со разни предмети: 12 учесници добија кривична
Штипската полиција поднесе кривична пријава против 12 луѓе поради насилство. Инцидентот се случил на 12 јули, кога членови на две семејства физички се пресметале, нарушувајќи го јавниот ред и мир.
Пријавените, од кои некои се обвинети за насилство во група, користеле различни предмети за време на конфликтот, што довело до тешки телесни повреди кај некои од учесниците.
„СВР Штип поднесе кривична пријава против Ш.K., М.K., М.K., А.K., А.K., М.Ќ. и Џ.Д. поради постоење основи на сомнение за сторено кривично дело „насилство” во група, и против М.Ќ., А.К, М.К, А.К., М.К., Е.Д., Џ.Д, Џ.Ј., М.К., А.Ј., Е.Д., Д.Ј., Џ.Ј. и Ѓ.Ј, поради постоење основи на сомнение за сторено кривично дело „насилство” со последица тешка телесна повреда. На 12.07.2024 во Штип, пријавените, членови на две семејства, го нарушиле јавниот ред и мир со меѓусебна физичка пресметка во која употребиле и разни предмети“, велат од МВР.
Топ
(Видео) Уапсени 13 лица за проституција и дрога во Тетовско и Охрид, едно лице е во бегство
Одделот за сузбивање организиран и сериозен криминал при МВР заедно со истражители од Истражниот центар на ОЈО ГОКК, а под раководство на Јавен обвинител од Основното јавно обвинителство за гонење на организиран криминал и корупција спроведоа координирана акција во рамките на која е целосно разоткриено злосторничко здружување во западниот дел од земјата. Во акцијата од слобода се лишени 13 лица, а едно лице е недостапно на органите на прогонот. Извршени се претреси на 17 локации во тетовскиот регион и во Охрид, соопшти МВР.
При претресите пронајдени и одземени се патнички возила, поголема количина на пари и злато, ресивери, нож, гасен пиштол, 3 лаптопи, радио врски, книги за евидентирање на гости и сметководствена документација. Во угостителските објекти пронајдени се 35 девојки по потекло од Украина, Русија, Р.С. Македонија, Србија, Молдавија , Албанија и Колумбија.
Групата одреден временски период се занимавала со посредување во вршење проституција и недозволена трговија со дрога, а нелегално стекнатите приходи од овие кривични дела припадниците на групата ги прикривале со перење пари и други приноси од казниво дело. Организираната група ја создал 35-годишник од селото Боговиње, кој ги организирал и координирал криминалните активности на другите припадници на групата и во угостителски објекти во с. Жеровјане, с. Горно Седларце и во Охрид наведувал на проституција девојки-странски државјанки кои работеле како танчерки во стриптиз-клубови.
Фактичкото работење на два од клубовите го организирал и раководел неговиот брат (второосомничениот), додека третиот осомничен раководел и ја организирал работата на стриптиз-клубот во Охрид. Четвртиот осомничен учествувал во наведувањето на проституција на девојките во угостителските објекти и бил задолжен за организација на нивното патување и влез во нашата земја, како и за олеснување на процедурите за добивање на документи за легален престој за странските државјанки, а давал и насоки за криминалните активности на другите припадници на групата во однос на сместување и превоз на девојките. Петмина припадници на злосторничкото здружување биле задолжени за обезбедување и неовластена продажба на дрога, најчесто кокаин, на девојките и гостите во угостителските објекти. Едниот од нив ги помагал и олеснувал активностите за пренос на дрогата и посебно бил ангажиран за предупредување при полициските контроли и бил задолжен да го следи движењето на полицијата на патот кон клубовите за што ги информирал членовите на групата. Двајца осомничени припадници на групата учествувале во наведувањето на проституција на девојките. Тие биле задолжени за обезбедување на девојки кои ќе работат во стриптиз клубовите, ги наоѓале преку нивни контакти во странски држави, веб страници и на интернет, го организирале нивниот влез во земјава, организирале изработка на лажна документација за фиктивен престој на девојките по хотели во нашата земја со што ги заобиколувале процедурите за добивање легален престој од управните органи. За превоз на девојките од аеродром и автобуските станици до стриптиз клубовите каде престојувале и биле сместени, како и превозот при нивното движење пред и по работата во ноќните клубови бил задолжен дванаесеттиот осомничен. Дел од криминалната група биле и две службени лица – затворски службеник од Затворот во Тетово и полицаец – виш инспектор од Тетово кои користејќи ја својата позиција и контактите, ја предупредувале групата за полициски акции, а вршеле влијание и за олеснување на прекршочните постапки кон групата и кон странските државјанки. Со повеќемесечни координирани дејствија на истражителите од Истражниот центар на ОЈОГОКК и припадниците на Одделот за сузбивање организиран и сериозен криминал при МВР активностите и задолженијата на секој член во ова злосторничко здружување се детално документирани и утврдени, информира полицијата.
Црна хроника
Маж од Скопје со пиштол удрил сограѓанин во кафеана
Вчера во 11.00 часот во село Визбегово, скопско, полициски службеници од Единицата за интервентна полиција при СВР Скопје го лишиле од слобода Ј.Д.(45) од Скопје.
Тој според полицијата, околу 09.55 часот во угостителски објект на подрачјето на Центар во Скопје со пиштол го удрил Т.П.(49) од Скопје.
По целосно документирање на случајот ќе следува соодвеетн поднесок, соопшти МВР.