Двајца кумановци  пријавиле во полиција дека, по претходен договор со А.С. во мај 2019, заедно со уште шест лица од Куманово заминале во Манхејн, Германија, каде што почнале со работа во градежна фирма.

Но, по три месеци од престојот, ним им биле исплатени само две плати и не им биле обезбедени документи и престој од А.С., согласно претходниот договор, по што си заминале од Германија.

Според пријавеното, тие имале неколку обиди да стапат во контакт со А.С., но таа не се јавувала, по што констатирале дека се оштетени и измамени за сума од 2.600 евра.

Од МВР велат дека се преземаат мерки за расчистување на случајот.

Охриѓанец на 33-годишна возраст кој имал решение за изолација предизвикал тепачка на булеварот Туристичка во Охрид.

Тој нападнал 23-годишен сограѓанин, откако со автомобил го напуштил својот дом.

„Со патничкото возило му го блокирал патот на М.Л., по што физички го нападнал. По целосно документирање на случајот, против напаѓачот ќе биде поднесена соодветна пријава“, велат од МВР.

Шеесет и едногодишен маж од Скопско утрово со секира ја нападнал својата сопруга додека таа спиела во семејниот дом во населбата Дрма.

Како што информираат од полицијата, мажот потоа избегал со возилото, а сопругата била пренесена во комплекс клиники „Мајка Тереза“ каде ѝ биле констатирани тешки телесни повреди.

Неколку часа подоцна мажот бил пронајден починат на нива со повреда на вратот.

Полициска екипа извршила увид, а по наредба на Јавен обвинител телото на починатиот било предадено за обдукција. Се работи на целосно расчистување на случајот.