Црна хроника
Полска:Мајка обвинета за убиство на пет новороденчиња

Државното обвинителство на округот Ломза на североистокот на Полска во петок против 41 годишна жена од тамошното село Хиполитова покрена обвинение за убиство на пет свои новороденчиња во периодот меѓу 1998 и 2012 година.
„Знаеме дека од 1998 до 2012 година жената родила шест деца, четири машки и две девојчиња. Сите деца се родени живи, но заклучивме дека пет од тие шест се мртви. Во тек е истрага за да се утврди што се случило со шестото дете“, изјави портпаролката на обвинителството Марија Кудјуба.
Посмртните останки на децата се пронајдени во подрумот и на таванот на куќата во која жената живеела со своите две други деца, на возраст од 7 и 10 години, и со партнерот. Децата се сместени во други семејства.
Жената има уште две возрасни деца, од бракот со мажот кој починал пред неколку години.
„Жената ја криела бременоста. Не се снаоѓала најдобро во животот, имала проблеми со алкохолот и била на социјална помош“, изјави за дневниот весник Gazeta Wyborcza портпаролот на судот во Ломза, Јан Лесчевски. /крај/хн/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Скопјанец осомничен за измама со фиктивна продажба на станови

Основното јавно обвинителство Куманово донесе Наредба за спроведување истражна постапка против едно физичко и едно правно лице за кои постои сомнение за сторено продолжено кривично дело – Измама од член 247 од Кривичниот законик.
Пријавениот сопственик на правното лице, со цел да прибави противправна имотна корист за себе и за својата фирма, лажно прикажувал факти дека врши посредување при продажба на станови и возила во сопственост на Агенцијата за управување со одземен имот – Скопје.
Осомничениот 35-годишник од Скопје на две оштетени лица во Куманово им се претставил како вработен во Агенцијата за управување со одземен имот и со нив склучил фиктивни договори за наводна продажба на станови во Скопје и Охрид. Измамените граѓани му уплаќале пари, еден дел во готово, а еден дел на сметка на правното лице, со што осомничениот прибавил вкупна противправна имотна корист од 115.754 евра.
Ценејќи дека се исполнети законските основи, јавниот обвинител до судијата на претходна постапка од Основниот суд во Куманово ќе достави предлог за определување мерка притвор за осомничениот, соопштија надлежните.
Црна хроника
Украдени бронзени бисти од градските гробишта „Бутел“

Вчера во СВР Скопје, Б.И.(67) и С.Ж.(76), двајцата од Скопје, пријавиле дека од гробни места од Градските гробишта Бутел биле одземени две бронзени бисти.
Според полицијата, се преземаат мерки за расчистување на случајот.
Црна хроника
Маж од Скопје останал и без пари и без стан: уапсена 55-годишна жена

Синоќа во 21.00 часот во Скопје, на подрачјето на општина Аеродром, полициски службеници од СВР Скопје ја лишиле од слобода В.С.Н.(55) од Скопје.
Таа се сомничи за сторено кривично дело измама.
Имено, од страна на 34-годишен скопјанец на истата и биле исплатени 172.732 денари при склучување на нотарски договор за посредување при купување на стан, но оштетениот подоцна дознал дека станот веќе бил продаден на друго лице, по што сфатил дека бил измамен.
По целосно документирање на случајот ќе следува соодветна пријава.