Црна хроника
Со 326 штеки цигари сакале да летнат за Лондон

Царинските службеници на скопскиот аеродром „Александар Велики“ спречија обид за шверц на 326 штеки цигари и нивно нелегално пренесување во Лондон.
Како што информираат од царинската управа, во понеделникот околу 05:30 часот за излез од Македонија на аеродромот се пријавиле штипјанецот Д.И и битолчанецот Ѓ.Т со намера да отпатуваат за Лондон.
Откако го чекирале багажот полн до акцизна стока без тоа да го пријават, двајцата биле селектирани за царинска контрола, а на прашањето дали имаат нешто да пријават, одговориле негативно.
Нивните куфери биле обезбедени од аеродромските служби за багаж и пристапено е кон детален преглед, при што се пронајдени 276 штеки Winston и 50 штеки Marlboro цигари.
Во текот на службениот разговор, прекршителите изјавиле дека една штека Marlboro во Велика Британија се продава по цена од 80 фунти, а Winston за 65 фунти. Лицата се носители на бугарски пасоши. На влез во Велика Британија го приложуваат на увид бугарскиот пасош со кој и остваруваат работен однос во земјата.
Цигарите се одземени, а против двете лица е поведена прекршочна постапка пред Комисијата за одлучување по прекршок. /крај/мф/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Лишени од слобода 12 лица во Гевгелиско, полицијата најде дрогa

Полициски службеници од СВР Струмица-ОВР Гевгелија синоќа во периодот од 22.00 до 03.00 часот на локален пат од село Миравци кон место викано „Бел Рај“, Гевгелиско ги лишиле од слобода Б.Ј.(25), С.Н., М.К.(31), Н.М.(20), А.И.(24), Ф.П.(22) и Д.Б.(34) сите од Скопје, Г.А.(21) и Т.Ј.(38) и двајцата од Кавадарци, К.П.(21) од Неготино, П.З.(38) од Радовиш и Е.Ј.(22) од Берово.
Како што соопшти МВР, во осум поединечни случаи при преглед на лицата или во возилата во кои се превезувале биле пронајдени марихуана и четири таблети виолетова боја.
За сите настани бил запознаен јавен обвинител од Основното јавно обвинителство Гевгелија, а по документирање на случаите против лицата ќе бидат поднесени соодветни поднесоци.
Црна хроника
Ни трага, ниту глас од исчезнатите мајка и син од Прилеп, полицијата ги бара

Полицијата во Прилеп трага по 36-годишната Л.И. и нејзиниот 17-годишен син, кои исчезнале на 18 јули, а случајот бил пријавен вчера на 25 јули, во 08:20 часот во ОВР Прилеп.
Како што информираше МВР, пријавата ја поднел С.Ќ. (48) од Прилеп, сопруг на исчезнатата жена. Според неговата изјава, Л.И. се оддалечила од семејниот дом заедно со својот син, а имала и здравствени проблеми. Од тогаш, од нив нема никаков контакт.
Полицијата соопшти дека се преземаат мерки за нивно пронаоѓање и расветлување на случајот.
Топ
Влегол на Онкологија и крадел од пациентите – притвор за 60-годишник

Скопското Обвинителство поведе постапка против 60-годишник осомничен за тешка кражба.
Кражбата ја извршил на Клиниката за радиотерапија и онкологија, каде искористил невнимание на еден пациент од велешко, ја протнал раката во неговиот џеб и одзел 300 евра и 28.000 денари.
Пациентот малку подоцна забележал дека му се украдени парите и пријавил во полиција, а сторителот бил идентификуван од снимките на видео камерите во болницата, соопшти Обвинителството.
Имајќи предвид дека сторителот бил и претходно осудуван, како и дрскоста со која делото сега го извршил во медицинска установа во која во исто време поголем број пациенти во тешка состојба, меѓу кои и оштетениот, чекале да примат терапија од која им зависи животот, јавниот обвинител на судијата на претходна постапка му предложи да определи мерка притвор за осомничениот. Притворот е прифатен.