Главната пошта кадешто во вторникот попладне избувна голем пожар не била осигурeна.

Директорот на „Македонски пошти“, Рафиз Алити, вели дека иако сега поштата не е осигурeна, бидејќи тендерот за избор на осигурителна компанија сè уште не бил завршен, во тендерот имало клаузула која ја обврзувало компанијата која ќе го добие тендерот, да го започне осигурувањето од 1 јануари 2013 година.

Тоа значи дека компанијата која ќе го добие тендерот ќе треба да ја исплати штетата од пожарот. Алити смета дека компаниите кои се пријавиле на тендерот нема да се откажат бидејќи ним им била позната оваа клаузула, но сè уште не комуницирале со ниедна од нив.

„Имавме отворен тендер, секоја година ја осигуруваме зградата. И оваа година ќе биде осигурeна, но тендерот е сè уште отворен. Во тендерот има една клаузула, тој што ќе ја осигурува зградата, односно ќе го добие тендерот, тоа осигурување да важи од 1 јануари 2013 година“ изјави Алити.

Тој вели дека во пожарот направена е минимална штета, првиот кат не бил оштетен, оштетен бил покривот, шалтер салата и некои канцеларии од вториот кат. Точната сума колкава штета е направена сè уште не се знае, стручна комисија што ќе биде формирана утре ќе први проценка.

Не се знае дали се изгорени парите од дневниот промет во шалтер салата и од менувачницата, но вработените пред да излезат од зградата ги прибрале во железните каси.

Увидот е сè уште во тек и се утврдуваат точните причини за пожарот. Засега останува претпоставката дека дошло до спој на електрични жици.

Пратките функционираат нормално, а се очекува наскоро да почне да се врши и наплата и исплата. Иако синоќа Алити првично рече дека пожарот избувнал од сервер салата, денеска новите информации говорат дека сервер салите не се оштетени ниту од огнот, ниту од водата.

Пожарот избувна во вторникот околу 16.30 часот, а пожарникарите го гаснеа скоро три часа./крај/фф