Црна хроника
„Бегајте назад, оти ќе ве убијам“ – сведоци за блиската средба со човек со пушка кај Смилковци

Сведоци на обвинителството во случајот „Монтрум“, кои ловеле риба на Смилковското езеро велат дека на денот на петкратното убиство пред нив излегол човек со пушка и им рекол „Бегајте назад, оти ќе ве убијам“.
Според исказот на првиот сведок, Ахмед Бекир, кога отишле на Смилковското езеро околу 16 часот да ловат риба, дошле три-четири момчиња со бел автомобил и им побарале леб за и тие да ловат риба. Сведоците им дале леб, а потоа момчињата заминале во непознат правец. По неколку часа, кога заминувале кон дома, на земјениот пат кај кривината кај Смилковското езеро ги пресретнал човекот со пушка во рацете, кој прво ги прашал како се викаат, а потоа им рекол „Бегајте назад, оти ќе ве убијам“.
Кога се вратиле назад, слушнале истрели еден по друг и го виделе белиот автомобил и мртвите момчиња.
Според исказот на вториот сведок, Несим Ќемал, човекот им се преставил како полицаец, а зад него имало уште три-четири лица кои исто како и непознатото лице со пушка биле облечени во темна облека. Човекот со пушка имал панцир на себе, а за останатите сведокот не можеше да потврди дали носеле панцири.
Пред да се појави човекот со пушка, сведокот видел уште едно возило, паркирано кај ткн. Втора плажа кај езерото, кое според него, било сива боја. На местото каде што биле убиени момчињата, сведокот тврди дека имало уште три-четири други рибари, но со нив сведоците немале никаков контакт.
Еден од адвокатите ги повика сведоците да кажат дали меѓу обвинетите го препознаваат човекот со пушка што ги пресретнал, на што сведоците одговорија дека не можат да кажат дека некој од обвинетите бил токму човекот со пушката.
Распитот на сведоците продолжува. /крај/ач/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Притворен 53-годишен дилер од Велес, продал кокаин за 50.000 евра

Основното јавно обвинителство Велес донесе наредба за спроведување истражна постапка против едно лице за кое постои основано сомнение дека сторило кривично дело – Неовластено производство и пуштање во промет наркотични дроги, психотропни супстанции и прекурсори.
„Осомничениот 53-годишник, на 29 ноември 2024 година, неовластено продал 994,8 грама кокаин на лице од Велес. Дрогата се договориле да му ја продаде за 50.000 евра, од кои околу половина од сумата купувачот-сведок оставил на договорена локација пред преземањето на пратката.“, соопшти Обвинителството.
Кокаинот тогаш беше откриен при истрага и претрес во куќа на улицата „Петар Алчев” во Велес, каде се утврди дека еден осомничен преработувал кокаин и тоа од чист кокаин во крек кокаин, а уште две лица во тоа му помагале. Против тие осомничени веќе е изречена првостепена осудителна пресуда, а со дополнителни дејствија се утврди идентитетот и на лицето кое првично ја продало дрогата.
По предлог на јавен обвинител, судија на претходна постапка од Основниот суд во Велес донесе решение со кое на осомничениот му определи мерка притвор.
Топ
Битолчанка сакала да ги убие своите баба и дедо, ги избодела со нож

Полицијата приведе жена од Битола која со нож ги избодела своите баба и дедо.
„По овластување на јавен обвинител од Основното јавно обвинителство Битола, екипи на МВР извршија увид на лице место во куќа на улицата „Солунска“, каде според првичните сознанија, внука при вршење семејно насилство се обидела да ги лиши од живот сопствените баба и дедо, нанесувајќи им повеќе убоди со нож“, соопшти Обвинителството.
Јавниот обвинител издаде повеќе наредби и насоки за целосно расчистување на настанот. Осомничената е лишена од слобода и се постапува за обезбедување докази.
Црна хроника
Полициска акција во Велес: пронајдени кокаин и над 30.000 евра

Одделот за криминалистичка полиција, Одделот за сузбивање на организиран и сериозен криминал и СВР Велес, во координација со јавен обвинител, на подрачјето на Велес спроведоа заедничка и координирана истрага против лица за кои постојат информации дека се инволвирани во случајот на купопродажба на еден килограм кокаин, кој беше запленет на 29.11.2024 и за кој СВР Велес поднесе кривична пријава против три лица.
Како дел од истрагата, денеска (11.06.2025), со наредби од Основен суд Велес, беа извршени претреси на повеќе локации во Велес и велешко.
Претреси беа извршени во куќата на А.В.(53) во Велес, во куќата, станот и викенд куќата на лицето С.С.(47) во Велес и Чашка, во куќа и плац на А.Ц.(29) во Велес и во станот на В.Л.(41) во Велес.
За време на претресите биле пронајдени и одземени кокаин, околу 37.000 евра, дигитална вага со остатоци од кокаин, мобилни телефони и други предмети за кои постои сомнение дека потекнуваат од кривично дело. Исто така, во текот на денот СВР Велес ќе поднесе кривична пријава против уште едно лице по член 215 од Кривичниот законик.