Александар Василески Нинџа обвинет дека го нападнал и пукал кон клучниот сведок во случајот Детонатор, Драган Стоименов во четвртокот пред судот негираше дека го нападнал Стоименов.

Двајцата обвинети даваа исказ пред судот, но оштетениот Драган Стоименов не се појави. На судењето присуствуваа и две судијки од САД, кои се во посета на Македонија за да им пренесат искуства на македонските судии за примената на новиот Закон за кривична постапка.

Според исказот на Нинџа, вечерта на 2-ри декември кога Стоименов беше повреден во ногата, Нинџа воопшто не се сретнал со него. Таа вечер заедно со својата сопруга биле на роденден кај пријателите, Ибраим и Сузана Ајдини.

Стоименов го знаел од пред десет години, од времето кога Стоименов работел како обезбедување и стоел на врата низ скопските дискотеки. Поинтензивно почнале да се дружат од пред две години кога почнале да се среќаваат во теретаната во скопскиот хотелот „Александар Палас“.

Поседувал и пушка и пиштол со дозвола, но тврдеше дека таа вечер не бил вооружен. Со оглед на тоа што бил припадник на специјалната единица „Лавови“, Нинџа тврдеше „ако сакав да го убијам Стоименов, сигурно немаше да биде жив“.

Другиот обвинет за овој напад, Никола Митревски Кољо пред судот рече дека Василевски „не е ни крив, ни должен“, вечерта воопшто не биле заедно. Го пОвика Стоиме4нов да ја каже вистината и да не „мести“ луѓе.Таа вечер Митревски бил во кафуле со своја пријателка и се разделиле кај трговскиот центар „Бисер“. Таму го сретнал Стоименов кој му кажал за тепачка во којашто учествувал Стоименов и која била снимена. Според Митревски, Стоименов и уште неколкумина истепале повозрасен човек и сетоа тоа го снимиле. Стоименов сакал да му ја покаже снимката и рекол дека ќе ја симне пред зградата каде што живее на булеварот во скопската населба  Јане Сандански.

Но потоа го поканил да се качат кај него во станот. Митревски одбил, по што Стоименов извадил пиштол и почнале да се борат. Во турканиците, пиштолот неконтролирано пукнал, па двајцата исплашени почнале да трчаат на различни страни. Митревски вели дека го видел Стоименов како трча и не претпоставувал дека е повреден.

Пред судот во четврток сведочеше и брачната двојка Ибраим и Сузана Ајдини, како и сопругата на Нинџа, Ивана Василевска кои потврдија дека Нинџа вечерта бил на роденден.

Пред судот се појави и таксистот кој според обвинението ги возел Нинџа и Кољо од Аеродром кон Автокоманда, но тој во четвртокот не можеше со сигурност да каже дека таа вечер ги возел токму двајцата обвинети. Во исказот пред истражниот судија посочил две лица кои биле најслични со оние кои ги возел.

Во судот во четврток не се појави оштетениот Стоименов за да сведочи, бидејќи не бил уредно поканет. Судењето е одложено за на 28-ми февруари во 10.30 часот.

Според обвинението, Василески заедно со Никола Митревски се договориле да го пресретнат Стоименов и да пукаат кон него.

Според обвинението, на 2-ри декември Митревски му пришол на Драганчо, а од другата страна се појавил Василевски и испукал еден куршум во неговото колено и избегале. Двајцата се товарат за обид за убиство, а Митревски и за помагање.

Стоименов досега преживеа четири напади врз него. Дел од обвинетите во Детонатор се товарат дека двапати му подметнале експлозивни направи во близина на неговиот автомобил, а првообвинетиот го бркал и со ловна пушка.

Александар Василески Нинџа се појави како сведок и во случајот „Ровер“ во кој му се суди на поранешниот министер за внатрешни работи, Љубе Бошкоски за убиство на Марјан Тушевски и Киро Јанев во 2001 година. Нинџа по 12 години првпат прозборе за овој случај и рече дека според неговите претпоставки, Бошкоски е нарачател на убиството на Тушевски./крај/мф/фф