Сообраќајната несреќа во која на 27-ми март кај клучката Хиподром пред Скопје, загина новинарот, уредник и основач на дневниот и неделник весник Фокус, Никола Младенов, била несреќен случај утврдиле судските органи по преземањето на истражните дејствија

Како што во вторникот соопшти истражниот судија портпаролот на Кривичниот суд Скопје Владимир Туфегџиќ, нема индиции дека станува збор за кривично дело, јави репортерот на Макфакс од Основнуиот суд Скпоје 1 Скопје.

Според него, во сообраќајната несреќа не учествувало друго возило. „Она што беше дел од шпекулации во јавноста дека имало контакт со друго возило, можам да кажам дека такви анализи немаме. Од левата страна на возилото нема траги од контакт од друго возило и трагите од боја кои се наоѓале од десната страна од возилото според анализите, официјални, не потекнуваат од боја која се става на автомобили, туку се работи за антикорозивно средство“ рече Туфегџиќ.

Утврдено е, исто така дека за време на несреќата Младенов не бил врзан со сигурносен појас, а обдукцијата покажала дека за време на несреќата држел цигара во раката.

Во врската со шпекулациите дека на местото на кое автомобилот излетал од патот има траги од кочење, било утврдено дека станува збор за две други изолирани сообраќајни несреќи коишто се случиле во 2010 и во 2012 година.

„Се работи за несреќен случај. Причините поради кои дошло до излетување на возилото биле предмет на испитување. Младенов возел со брзина од 160 километри на час”, рече Туфегџиќ.

Смртта настанала, како што рече Туфегџиќ, насилно со пукање на аортата, а кај Младенов не биле пронајден алкохол и психотропни супстанци во крвта.

Во врска со мобилниот телефон на Младенов, Туфегџиќ рече дека не поседува информации за негово евентуално пронаоѓање, и дека целата оваа документација ќе биде предадена до Основното јавното обвинителство коешто треба да одлучи дали ќе отвори истрага во врска со сообраќајната несреќа во којашто загина Младенов.

Од досегашните анализи не е утврдено каде претходно бил Младенов. (следува проширена верзија).