Црна хроника
Продолжува распитот на роднините на обвинетите во Монструм

Во Основниот суд 1 продолжи распитот на роднините на обвинетите во случајот Монструм, кои се предложени како сведоци на одбраната.
Братот на еден од обвинетите, Фејзи Азири тврдеше дека на денот кога се случи убиството биле заедно со брат му во фармата во Белимбегово и исто како и другите сведоци тврдеше дека Фејзи вечерта си заминал сам од фармата, бидејќи требало да однесe нешто кај негов пријател.
Судењето почна со еден и пол час задоцнување, а судот неколку часа го испрашуваше братот на Фејзи.
Судењето продолжува без првообвинетите, Алил Демири и Африм Исмаиловиќ кои сè уште не се екстрадирани од Косово, кадешто се во притвор.
Македонското Министерство за правда, откако ги преведе, ги испрати документите за екстрадиција. Сега косовското Mинистерство за правда треба да одлучи дали двајцата обвинети ќе бидат испорачани во Македонија.
На 12-ти април минатата 2012 година без причина беа убиени Кире Тричковски, Филип Славковски, Цветанчо Ацковски, Александар Наќевски и Борче Стефковски. Сé уште не се знае зошто момчињата и рибарот беа свирепо егзекутиран. Во обвинителниот акт единствено стои дека убијците имале цел да предизвикаат создавање на чувство на несигурност и страв кај граѓаните на Македонија./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Сè изгоре, пожар во прилепско село остави пустош и милионска штета

Голем пожар вчера попладне ја зафати имотната површина на семејство во прилепското село Канатларци, при што целосно изгореа помошни простории и вредна земјоделска механизација. Според полицијата, материјалната штета е проценета на околу 5 милиони денари.
Пожарот избувнал на 29 август околу 13:20 часот во дворниот простор на куќата на С.К. (44) од Канатларци. За неполни два часа пламенот проголтал летна кујна, штала и гаражи, а во нив и огромна количина земјоделски добра.
Од огнот биле уништени помошните објекти, 500 до 600 балиња тутун, два моторцикли („Хамачи“ и „Шинерај“), повеќе апарати за домаќинство, мебел и разни кујнски предмети. Освен тоа, во пепел завршиле и мотор „Титаник“, електрична машина за нижење тутун „Тобако“, тракторска опрема, како и патничко возило „Цитроен Берлинго“.
Трагедијата е уште поголема со оглед дека изгореле и дополнителни 300-400 бали тутун, околу 2.000 метри најлон за садење бостан и цел систем за наводнување од 4.000 метри. Огнот не поштедил ниту три трактора – еден „Џондир“ и два „Тафе“, од кои едниот е целосно изгорен, а другиот делумно оштетен.
Противпожарните екипи успеале да го изгаснат пожарот околу 15:35 часот, но зад нив останал вистински пустош. Од Министерството за внатрешни работи информираат дека увид на местото извршиле вешто лице и екипа на ОКТУПА, а причините за избувнувањето на огнената стихија дополнително ќе се утврдуваат.
Топ
Маж ја тепал бремената сопруга: јa притискал за вратот и ја удирал главата од креветот

Јавен обвинител од Основното јавно обвинителство Скопје поведе постапка против државјанин на Република Хрватска, кој е осомничен за кривично дело – Телесна повреда од член 130 став 2 во врска со став 1 од Кривичниот законик.
При вршење семејно насилство во домот во Скопје тој телесно ја повредил неговата сопруга. Најпрво почнал да и се обраќа на висок тон, а потоа физички ја нападнал удирајќи ја со тупаници и шлаканици по главата и телото. Потоа продолжил силно да ја притиска за вратот, иако знаел дека е во петтиот месец од бременост. Во еден момент ја зграбил и насилно ја фрлил во креветот, по што и ја удирал главата од ивицата на креветот. Престанал кога оштетената започнала да крвари, по што жртвата успеала да се засолни во тоалетот и да повика полиција и брза помош.
Осомничениот слушнал дека повикува помош, по што го напуштил станот. Кај оштетената била констатирани бројни повреди на главата, но и на плацентата во која е сместен плодот.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот.
Црна хроника
Тешко повреден 15-годишник од Канада: со мопед удрил во лисица во Охридско и паднал

Денеска (29.08.2025) околу 03:30 часот во СВР Охрид e пријавено дека на ул.„Радојца Новичиќ“ во Охрид, 15-годишен малолетник од Канада, a со престој во с.Долно Лакочереј, охридско, управувајќи мопед „априлија“ со охридски регистарски ознаки, удрил во лисица и паднал на коловозот.
Во несреќата со тешки телесни повреди се здобил малолетниот возач, констатирани во Специјалната болница „Св.Еразмо“ во Охрид.
Извршен бил увид од увидна екипа од СВР Охрид.