Јапонскиот електронски гигант Sony соопшти дека оствари годишен профит првпат во последните пет години, благодарение на продажба на имотот и слабеењето на јенот.

Компанијата во финансиската година до 31-ви март остварила нето добивка од 436 милиони долари, додека во истиот период лани забележа загуба од 4,6 милијарди долари.

Sony соопшти дека за зголемување на продажбата влијаело слабеењето на јапонскиот јен во однос на другите валути, што ги намали цените на нејзините производи во странство.

Аналитичарите оценуваат дека за позитивниот бизнис резултат најмногу придонела продажбата на имотот на компанијата, пренесе BBC.

Sony очекува дека оваа финансиска година ќе оствари профит од околу 450 милиони долари, доколку се задржи нискиот курс на јенот, што и се очекува.

Јапонската валута за повеќе од 20 отсто ослаби во однос на доларот, од ноември минатата година, по што политичарите претставија агресивни мерки за поттикнување на економскиот раст.

Sony некогаш беше пазарен лидер во разни категории на потрошувачка електроника, но во последните неколку години доживеа голем бизнис пад, пред сé, поголемата конкуренција, падот на цените и намалувањето на маржата на заработка.

Најлошо стоеше одделението за телевизори, кое е во минус цели осум години./крај/мф/бб