Околу 70 дела се украдени ноќта од 22-ри кон 23-ти мај од ателјето на академскиот сликар Пеце Видимче во скопската населба Козле, информираа за Макфакс од семејството на уметникот.

Според внуката на сликарот, Викторија Видимче, станува збор за дела што имаат значајна вредност за македонската култура и уметност, бидејќи Пеце Видимче е еден од првите македонски уметници коишто се афирмираат по Втората светска војна, во текот на 1950-те години. Делата ги имаат потребните сертификати за потеклото.

Од Министерството за внатрешни работи на претставниците на семејството кои ја пријавиле оваа тешка кражба, им било кажано дека се направени првите истражни дејствија. Исто така, се претпоставува дека за овој случај ќе биде информиран и ќе се заинтересира и Интерпол, бидејќи е малку веројатно оти делата се наменети за домашниот пазар на уметнички дела.

Според обемот на украдените дела, имајќи ги предвид нивните димензии, најголемиот дел со димензии од 2 на 1,5 метар, како и дека станува збор за густо населена област од градот, може да се претпостави дека станува збор за организирана криминална група, можеби поврзана и со црниот пазар на уметнички дела, пошироко во регионот./крај/мф/сн