Првообвинетите во случајот „Монструм“, Африм Исмалиовиќ и Алил Демири, беа осудени во приштинскиот суд на две и на две ипол години затвор за нелегално поседување на оружје.

Дали и кога ќе бидат испорачани косовските власти ќе одговорат дури откако целосно ќе заврши судењето во Приштина, а доколку има жалби на денешната пресуда ќе поминат најмалку неколку месеци додека да стане правосилна со што неизвесно е кога би се случила екстрадицијата. Нивните адвокати најавија жалба.

Одбраната на Демири и Исмаиловиќ на судењето за оружјето рече дека тие не биле виновни за процесот кој се води против нив во Македонија за петкратното убиство кај Смиљковското Езеро, јави Канал 5.

Во меѓувреме, како што јави репортерот на „Макфакс“ од Основниот суд во Скопје, каде продолжи судењето за другите обвинети во „Монструм“, во петок пред судот сведочеле вешти лица од МВР.

Според нивните вештачења, една чаура од пукањето во кое учествувал обвинетиот Фејзи Азири на фармата во селото Белимбегово во 2009 година се совпаѓала со 11 чаури што биле најдени на местото на петкратното убиство кај Смилковското Езеро.

Според вештите лица, чаурите биле испукани од автоматска пушка, која се користела и во убиството.

Но, одбраната на обвинетите изрази сомнеж за ова вештачење бидејќи не се пронајдени ниту зрната, ниту пак оружјето со кое биле испалени чарите што се совпаѓаат.

Тие побараа да се направи вештачење во друга странска институција, јави репортерот на „Макфакс“./крај/мф/фф